АҚШ йўлларида хавфсиз ҳаракатланиш миллий бошқармасига (NHTSA) юзлаб Honda Accord эгаларидан шикоятлар келиб тушди. Ҳайдовчиларнинг таъкидлашича, ҳаракатланиш вақтида автомобил ўз-ўзидан траекториясини бесабаб ўзгартириши мумкин, деб хабар беради Motor.
NHTSA'нинг ҳисоблашича, муаммо оммавий характерга эга бўлиб, 2013—2015 йилларда ишлаб чиқарилган 1,1 миллион Accord нусхаларига тааллуқли бўлиши мумкин. Миллий бошқарма автомобиль эгаларидан келиб тушган 107 та шикоят ва «руль аномалияси» сабаб юзага келган дея тахмин қилинаётган иккита аварияни ўрганишни бошлаган.
«Рул аномалияси»га боғлиқ биринчи ҳолат ҳақида 2020 йилнинг октябрида маълум бўлган. Ўшанда NHTSA'га 2013 йилда ишлаб чиқарилган Honda Accord эгаси мурожаат қилганди. Ҳайдовчи автомобиль «бир неча бор ўз-ўзидан 90 даражага бурилиб кетганини» маълум қилган ва ушбу ҳолатни текширишни сўраган.
NHTSA айни вақтида муаммо кўламини ва хавфсизлик билан боғлиқ оқибатларни баҳоламоқда. Honda’нинг маълум қилишича, компания тергов ишларига ҳар томонлама ёрдам кўрсатмоқда. «Автомобильларимизнинг хавфсизлиги билан боғлиқ масалаларга жиддий ёндашамиз ва NHTSA билан ҳамкорликни давом эттирамиз», — дейилади баёнотда.
Оммавий нуқсон борасидаги факт тасдиқланса, япон маркаси АҚШда сотилган миллиондан ортиқ машинасини чақириб олишга мажбур бўлади.
Аввалроқ General Motors 50 мингдан ортиқ электрокарларини чақириб олиши тўғрисида хабар берилганди.
Изоҳ (0)