Танзаниянинг янги президенти Самия Сулуҳу Ҳассан бир ой аввал афв этган икки нафар собиқ маҳбус оломон томонидан дўппослаб ўлдирилди. Бу ҳақда The Citizen нашри хабар берди.
Маълумотларга кўра, ўғрилик билан қамалган икки нафар эркак 2021 йилнинг 12 апрель куни Танзания президенти томонидан афв этилиб, қирғоқ бўйида жойлашган Кибаха шаҳрининг Мкуза қамоқхонасидан озод қилинган.
Пвани округи полициясининг бошлиғи Ванкио Ньигесанинг сўзларига кўра, собиқ маҳбуслар президент томонидан афв этилгач, яқинда ўз уйларига қайтган. Лекин ғазабланган маҳаллий аҳоли уларни талончиликка алоқадорликда айблаб, калтаклаган.
Полиция жамоатчиликни ғазаб баҳонасида қонун номидан иш тутмасликка ва бунинг ўрнига гумонланувчиларни ҳибсга олиш ва суд ҳукмига топшириш учун жиноят тўғрисида полицияга хабар беришга, шунингдек, собиқ маҳбусларни камситмасликка чақирди.
Танзания президенти Жон Магуфули билан видолашиш маросимида юзага келган оломон тиқилинчи оқибатида 45 киши ҳалок бўлди, 37 киши жароҳат олди. Жон Магуфули 61 ёшида вафот этди. Аввалроқ Танзания мухолифати раҳбари Тунду Лиссу президентнинг коронавирус билан касаллангани ва қўшни давлат Кенияда касалхонага ётқизилгани ҳақида айтганди. Аммо президент ўлимининг расмий сабаби сифатида юрак билан боғлиқ муаммолари келтирилди.
Унинг ўлимидан сўнг Танзания собиқ вице-президенти Самия Сулуҳу Ҳасан мамлакат президенти сифатида қасамёд қилди. Шу тариқа Танзания тарихида илк бор аёл киши президентлик лавозимини эгаллади.
Изоҳ (0)