Бош вазир ўринбосари Очилбой Раматов вилоят ҳокимлари билан бирга, марказлашган инвестициялар ҳисобидан май—июнь ойларида 4,5 триллион сўмлик ишларни амалга оширишга шахсан масъул ва жавобгар бўлади. Бу ҳақда 12 май, чоршанба куни Президент Шавкат Мирзиёев раислигида ўтказилган йиғилишда давлат раҳбари таъкидлаб ўтди, дея хабар бермоқда «Дарё» мухбири.
«Биринчи чоракда марказлашган инвестициялар бўйича режага нисбатан 2,7 триллион сўмлик (56 фоиз) ишлар кам бажарилган. Шу билан бирга, 175 та уй-жойлар массивининг (1 мингта кўп қаватли уй) бор-йўғи 36 таси бўйича пудратчилар аниқланган.
Бунда, Қорақалпоғистон, Бухоро, Жиззах, Самарқанд, Сирдарё, Хоразмда объектлар қурилиш рейтинги бўйича мос келмайдиган қурувчи ташкилотларига берилган.
Раматов, Зокиров вилоят ҳокимлари билан бирга, икки ҳафта муддатда 139 та турар жой массивлари бўйича тендерларни якунлаб, қурилиш ишларини бошласин», — деди Шавкат Мирзиёев.
Давлат раҳбари қурилиш борасидаги лойиҳалар тендер бўйича фақат рейтингда бор қурилиш ташкилотларига берилишини қатъий таъкидлади.
«Тендердаги лойиҳалар рейтингда йўқ қурилиш компанияларига бериб юбориляпти. Раматов менга баландпарвоз гаплар керак эмас. Тадбиркор тадбиркорлигини, қурувчи қурувчилигини қилсин. Ҳар бир лойиҳа рейтингда мавжуд қурилиш ташкилотларига берилади. Агар шундай қилсак, қурилиш соҳасида коррупция йўқ бўлади. Тадбиркор қурилиш қилса, нима бўлишини Жиззах мисолида кўрдик», — деди Президент.
Изоҳ (0)