Қозон мактабидаги отишмадан кейин Путин қуролга эгалик қилиш қоидаларини кучайтиришни буюрди

Қозон мактабида отишма содир бўлганидан сўнг, Россия президенти Владимир Путин Миллий гвардия бошлиғига шошилинч равишда фуқаролик муомаласи учун рухсат берилган қурол турлари бўйича янги қоидалар ишлаб чиқишни буюрди. Бу ҳақда президент матбуот котиби Дмитрий Песков маълум қилди.

Песковнинг сўзларига кўра, Россия гвардияси бошлиғи Виктор Золотовга отишмада ҳужумчи томонидан фойдаланилган қурол турини ҳисобга олган ҳолда, фуқаролик муомаласига рухсат берилган қурол турлари тўғрисида янги низом ишлаб чиқиш буюрилган.

«Гап шундаки, айрим мамлакатларда ҳужум қуроллари сифатида ишлатиладиган милтиқлар баъзан бизда ов қуроллари сифатида рўйхатдан ўтказилади. Бу ҳақида ҳам Россия гвардияси томонидан шошилинч равишда қоидалар ишлаб чиқилади», — деди Кремль вакили.

Life Shot нашрининг ёзишича, Қозон мактабидаги отишмани уюштирган Илназ Галявиев февраль ойида овчилик гувоҳномасини олган ва икки ойдан сўнг у 2017 йилги Hatsan Escort милтиғини рўйхатдан ўтказган. Худди шу қуролдан 2018 йил октябрь ойида Керч политехника коллежида қирғин уюштирган Владислав Росляков ҳам фойдаланган эди. Ўша жиноятдан кейин Миллий гвардия мамлакатда қурол-яроғ айланиши қоидаларини ўзгартиришни таклиф қилган.

Песков мактабдаги отишмалардан сўнг, Путин Қозонга иккита вазирини юборганини айтди.

Хусусан Таълим вазирлиги раҳбари Сергей Кравсов ва Соғлиқни сақлаш вазирлиги раҳбари Михаил Мурашко 175-мактабдаги отишма муносабати билан Қозонга жўнаб кетган.

Песковнинг сўзларига кўра, Путин аллақачон Федерал хавфсизлик хизмати (ФХХ) раҳбари Александр Бортниковнинг Қозон мактабидаги отишма ҳақидаги ҳисоботини тинглаган, шунингдек, бош вазир Михаил Мишустин, бош вазир ўринбосари Татяна Голикова ва фавқулодда вазиятлар вазири Евгений Зиничев билан телефон орқали суҳбатлашган.

Ушбу суҳбатлар давомида Қозонга тиббиёт ходимлари, психологлар ва тиббий жиҳозларидан иборат самолёт жўнатишга қарор қилинди, деб хабар беради «Интерфакс».

Россия Тергов қўмитасининг маълум қилишича, мактабдаги отишма содир бўлгани тўғрисида, Жиноят кодексининг 2-қисми 105-моддаси (икки ёки ундан ортиқ одамни ўлдириш) бўйича жиноий иш қўзғатилди. Иш қўмитанинг марказий аппарати томонидан текширилади.

Эслатиб ўтамиз, Россиянинг Қозон шаҳридаги 175-сонли мактабда 11 май куни эрталаб отишма содир бўлди. Мактабдаги отишмадан кейин портлаш юз берган. «РИА Новости» маълумотларига кўра, отишмада камида 11 киши ҳалок бўлди. Шунингдек, 32 нафар жабрланувчи ҳақида ҳам хабар берилди, улардан 16 нафари касалхонада. Мактаб биноси қуршаб олинган. Ўқувчилар яқин атрофдаги болалар боғчасига эвакуация қилинган. Кўплаб мактаб ўқувчилари бино деразаларидан сакраган. Уларнинг икки нафари ҳалок бўлган.

Отишмада ҳалок бўлганлар хотирасига бағишлаб Татаристонда 12 май мотам куни деб эълон қилинди.