Кетма-кет тўрт мавсум давомида суратга олинган «Қора ният» сериалининг рейтинги қониқарли даражада бўлса-да, лойиҳани якунлаш ишлари режалаштирилган эди. Аммо сериал продюсерлари бешинчи фаслни ҳам давом эттиришга қарор қилди, деб ёзади «КиноТека».
Бу ҳақда сериалда Эндер ролини ижро этган Шеввал Сам продюсерлик компаниясининг қарорини TV 100 телеканалига берган интервьюсида маълум қилган: «Аслида биз сериални якунлашни режалаштирган эдик. Сабаби ҳамма чарчаган. Аммо мухлислар бешинчи мавсумни давом эттиришни сўраб ижтимоий тармоқлар орқали жуда кўп хабарлар юборди. Ушбу лойиҳани кўпчилик яхши кўради ва шунинг учун ҳам сериални давом эттиришга қарор қилдик. Шунингдек, биз ҳам дам олишга муҳтожмиз. Ушбу мавсум эрта якунланса, навбатдагисини бироз кейинроқ суратга олишни маълум қилдик. Шу баҳонада дам олишга ҳам вақт ажратамиз», – дейди актриса.
Хабарларга кўра, лойиҳа финал қисмдан сўнг кузгача томошабинлар билан хайрлашади.
Эслатиб ўтамиз, бироз аввал сериал юлдузи Несрин Жавадзаде лойиҳани келишмовчилик туфайли тарк этган эди. У сериал режиссёри билан бўлиб ўтган низодан сўнг суратга олиш ишларини якунлаган. Продюсер Фатиҳ Аксой ушбу вазиятдан сўнг унинг қаҳрамони Шаҳикани ўлим саҳнаси орқали сериалдан четлатди. Шу тарзда сериални бир ижодкор тарк этса, ўрнини бошқаси эгалламоқда. Бундан ташқари, янги қисмлардаа Эже Диздар Чагатайнинг собиқ рафиқаси сифатида пайдо бўлади. Диздарнинг қаҳрамони янги мавсумда ҳам иштирок этиши маълум қилинган.
Изоҳ (0)