Ҳиндистонда COVID-пандемия фонида одамларнинг хавфли замбуруғларга чалиниш ҳолатлари кўпайди

Ҳиндистонда аҳолининг 242 мингдан ортиғини ҳаётдан олиб кетган коронавируснинг иккинчи тўлқини «қутураётган» бир пайтда маҳаллий шифокорлар мукоромикоз инфекциясини тобора кўпроқ қайд этмоқда, деб ёзади «Интерфакс». Ушбу инфекцияни мукор замбуруғлар оиласига тааллуқли ҳар хил турдаги замбуруғлар келтириб чиқаради.

Баъзан қора пўпанак (black fungus) деб ҳам аталувчи ушбу касаллик COVID-19’га чалинган беморларда ёки коронавирусдан соғайганларда тез-тез учрайди.

Мукоромикоз — камдан-кам учрайдиган касаллик бўлиб, унинг белгилари оғриқ ва безгакни келтириб чиқарувчи бурун ва танглайнинг некротик зарарланишидан иборат. Бундан ташқари, марказий асаб тизими томонидан ҳам симптомлар юзага келиши мумкин, беморлар кўзнинг шиши ва оғришидан шикоят қилади. Касаллик натижасида бурун бўшлиғи, мия ва ўпкаларга зарар етади. У диабет ҳамда ОИВ/ОИТС ва саратон билан касалланганлар учун ўлим келтирадиган даражада хавфлидир. Мукоромикоздан ўлим даражаси 50 фоизгача етиши мумкин.

Касалликни тупроқ, ўсимликлар, компост, чириган мева ва сабзавотларда учрайдиган турли замбуруғлар қўзғатади. Ҳиндистонлик шифокорларнинг айтишича, замбуруғлар изларини соғлом одамларнинг бурун бўшлиғида ва шиллиқ қаватида топиш мумкин.

Ҳиндистонлик мутахассис Акшай Наирнинг фикрича, мукоромикоз билан касалланиш даражасининг ўсиши коронавируснинг оғир шаклини даволашда стероидлардан фойдаланиш сабаб бўлган бўлиши мумкин.

Стероидлар ўпкалардаги шамоллашни камайтиради, аммо шу билан бирга, улар иммунитетни пасайтириб, қондаги қанд миқдорини ошириши мумкин. Ҳинд шифокорлари қайд этишича, беморлар COVID-19’дан соғайганидан кейин 12—15 кун ўтиб, мукоромикозга чалинмоқда.

Мумбайнинг бир йўла учта шифохонасида ишлаётган Наирнинг айтишича, апрель ойида шахсан ўзи мукоромикозга чалиниш билан боғлиқ 40 га яқин ҳолатга гувоҳ бўлган. Уларнинг кўпчилигини коронавирусга чалинган диабетиклар ташкил қилади. Уларнинг 11 нафари операция қилиб, замбуруғ инфекцияси мияга тарқалмаслиги учун кўзларини олиб ташлашга тўғри келган.

Илгари бир йил ичида олтитадан кўп бўлмаган ҳолат аниқланган бўлса, ўтган икки ой мобайнида Мумбайнинг Сион туманининг ўзида мукоромикозга чалиниш бўйича 24 та ҳолат қайд этилган.