Тошкент шаҳар ҳокимлиги Сталин даврида қурилган 300 га яқин бино фасадини янгиламоқда

Тошкент шаҳар ҳокимлиги Навоий, Нукус ва Шота Руставели кўчаларидаги 291 та бинонинг фасадини янгиламоқда. Уларнинг айримлари моддий маданий мерос объектлари реестрига киритилган. Бу ҳақда пойтахт ҳокимининг коммунал масалалар бўйича ўринбосари вазифасини бажарувчи Шоҳрух Раҳимжоновга таяниб, «Gazeta.uz» хабар берди. Лойиҳа Тошкент шаҳар ҳокими Жаҳонгир Ортиқхўжаевнинг топшириғига асосан амалга оширилмоқда.

Шоҳрух Раҳимжоновнинг сўзларига кўра, бинолар фасади таъмирталаб аҳволга келиб қолган. «Сталинка»ларда савдо нуқталари ва офислар очишда алюкобонд каби замонавий материаллардан фойдаланилган. Бу бинонинг меъморий кўринишини бузган, ўзининг архитектуравий аҳамиятини йўқотган. «Қандай бўлганини архивлар орқали кўриб, дастлабки кўринишини қайтаряпмиз», — дейди ҳоким ўринбосари.

Маълум қилинишича, Навоий кўчасидаги жами 82 та, Нукус кўчасида — 113 та ва Шота Руставели кўчасида 96 та бинонинг фасади янгиланади. Таъмирлаш ишлари шаҳар бюджети ҳисобидан амалга оширилади. Раҳимжоновнинг таъкидлашича, фасадларни бўяш ишлари уй-жой мулкдорлари ширкати томонидан амалга оширилиши керак, бироқ уларнинг кўпчилиги бунга қодир эмаслиги ҳисобга олиниб, шаҳар барча харажатларни зиммасига олган.

Шоҳрух Раҳимжоновнинг айтишича, кондиционерлар ҳам битта қаторга жойлаштирилган, фасаддан симлар олиб ташланган, бўғотлар янгиланган. Деворлар грунтланган, штукатурка, шпаклёвка қилинган ва ёрқин сарғиш рангга бўялган. Бошқа биноларни таъмирлашда ҳам худди шу принципдан фойдаланилади. Ҳоким ўринбосарининг сўзларига кўра, уйларнинг пойдевор қисми гранит билан қопланган, бироқ аҳолининг айтишича, қоплаш ишлари «мармарга ўхшаш» кафелдан қилинган.

Ўзбекистон Архитекторлар иттифоқи раиси ўринбосари Асомиддин Тожиевнинг маълум қилишича, моддий маданий мерос реестрига Тошкентдаги Сталин даврида қурилган 50—70 та уй киритилган. Марказий кўчаларда жойлашган барча биноларнинг, шунингдек, маданий мерос объектларининг безаш паспортлари бор бўлиб, ҳар қандай таъмирлаш ва реконструкция ишлари шунга кўра амалга оширилиши керак. Унинг сўзларига кўра, Маданият вазирлиги ҳузуридаги Маданий мерос департаменти ушбу ишларни назорат қилиши лозим.

Асомиддин Тожиевнинг таъкидлашича, моддий маданий мерослар, жумладан, Навоий, Нукус ва Шота Руставели кўчаларидаги Сталин даврида қурилган бинолар билан ишлаганда максимал даражада меъморий элементларни сақлаб қолиш лозим. Карнизларни алмаштириш керак эмас. Ойна ромлари реставрацияга жавоб бермаган тақдирда алмаштирилиши лозим. Имкони бўлса, уларни айнан ўша материалдан тайёрланган янги ромларга ёки архитекторлар томонидан ҳисобга олинган ранглар палитраси ва шаклини ҳисобга олиши керак.

Асомиддин Тожиевнинг қўшимча қилишича, амалга ошириладиган ишлар — бу режавий таъмирлаш. Унинг сўзларига кўра, фасадлар бўялишга муҳтож. Охирги марта улар етти йил олдин янгиланган. Ўтган қиш, кучли музламалар ва ёғингарчиликнинг кўплиги бўёқ ва штукатурканинг кўчишига олиб келган.

Шоҳрух Раҳимжоновнинг таъкидлашича, Нукус, Навоий ва Шота Руставели кўчаларидаги ишлар якунлангач, шаҳар бошқа кўчалардаги биноларнинг фасадини янгилашга киришади. Архитекторлар иттифоқи раиси ўринбосари Асомиддин Тожиевнинг айтишича, ишлар якунлангач, унга баҳо бериш мумкин бўлади. «Ҳозирча ҳеч қандай қоидабузарликларни кўрмадик», — дейди у.