Toshkent viloyatida tanishlari orqali IIV Qorovul qo‘shinlarining quyi tizimiga xizmatga joylashtirishni va’da qilib, buning evaziga 4,5 ming dollar talab qilgan shaxs qo‘lga olindi. Bu haqda Bosh prokuratura huzuridagi Departament xabar berdi.
Foto: Bosh prokuratura huzuridagi Departament
Ma’lum qilinishicha, G‘.Sh. ismli shaxs fuqaro Sh.ning ishonchiga kirib, uni xizmatga joylashtirish evaziga pul talab qilgan va kelishilgan summaning 2,5 ming dollarini olgan vaqtida tezkor tadbir ishtirokchilari tomonidan ashyoviy dalillar bilan ushlangan.
Hozirda holat bo‘yicha G‘.Sh.ga nisbatan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda tanishini 600 dollar evaziga tez tibbiy yordamga ishga kiritib qo‘ymoqchi bo‘lgan hamshira ushlangani, Toshkentda 30 ming dollar evaziga prokuratura organlariga ishga joylashtirishni va’da qilgan shaxslar qo‘lga olingani, Farg‘onada ichki ishlar organlariga ishga kiritib qo‘yish uchun ayoldan 2 ming dollar talab qilganlar ushlangani haqida xabar berilgan edi.
