Сурхондарё вилоятида Damas ҳайдовчиси уч кишини уриб юбориб, воқеа жойидан қочиб кетди. Жабрланганларнинг икки нафари шифохонада вафот этган, деб хабар беради вилояти ИИБ ахборот хизмати.
Маълум қилинишича, 6 май куни соат 22:45 ларда Шеробод туманида 31 ёшли Damas ҳайдовчиси йўлнинг ўн томони чети бўйлаб ҳаракатланаётган уч фуқарони уриб юбориб, воқеа жойидан қочиб кетган.
ЙТҲ оқибатида учала фуқаро ҳам турли тан жароҳатлари билан шифохонага етказилган. Кўрсатилган ёрдамга қарамай, жабрланувчиларнинг икки нафари шифохонада вафот этган.
Мазкур ҳолат бўйича туманда тўсиб ушлаш режаси амалга оширилган ва ҳайдовчи қўлга олинган. У тегишли ҳужжатларсиз Damas’ни бошқаргани учун қочиб кетгани аниқланган.
Ҳайдовчига нисбатан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми «а» банди ва 117-моддаси (хавф остида қолдириш)3-қисми «а» банди билан жиноят иши қўзғатилиб, Жиноят-процессуал кодексининг 221-моддаси тартибида ушланган. Дастлабки тергов ҳаракатлари олиб борилмоқда.
Аввалроқ Навоийда ҳайдовчининг тезликни ошириши оқибатда уч нафар йўловчи вафот этгани, Тошкентда Captiva Nexia ва «Москвич»га бориб урилиши оқибатида бир киши ҳалок бўлгани ва яна тўрт нафари жароҳатлангани, Деҳқонободда бошқарувни йўқотган Cobalt ҳайдовчиси «Жигули»га урилиши оқибатида «Жигули» ҳайдовчиси воқеа жойида вафот этгани тўғрисида хабар берилганди.
Изоҳ (0)