Навоий вилоят ИИБ ЙҲХБ матбуот гуруҳи катта инспектори Фарруҳ Якубовнинг «Дарё»га маълум қилишича, вилоятнинг Қизилтепа туманида ҳайдовчининг тезликни ошириши уч кишининг ҳаётдан кўз юмишига сабаб бўлган.
Таъкидланишича, 2021 йилнинг 3 май куни соат 21:00 да Қизилтепа тумани ҳудудидан ўтган 4Р63 Когон—Қизилтепа—Тошробот—Янгиқўрғон автомобиль йўлидан Когон—Қизилтепа йўналиши бўйлаб ҳаракатланиб келаётган Tracker-2 ҳайдовчи С.Х. тезликни ошириб, бошқарувни йўқотган. Оқибатда йўлнинг чап томонига чиқиб кетиб ағдарилган. ЙТҲ натижасида автомобиль салонида бўлган икки нафар фуқаро воқеа жойида, бир нафар фуқаро эса туман тиббиёт бирлашмасининг жонлантириш бўлимида вафот этган. Ҳайдовчи эса тан жароҳати олган.
Мазкур ҳолат юзасидан Қизилтепа туман ИИБ томонидан ҳайдовчига нисбатан Жиноят кодексининг 266-моддаси 3-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш оқибатида одамлар ўлимига олиб келиш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ Наманганда 6 кишининг умрига зомин бўлган автоҳалокатни содир этган ҳайдовчи 10 йилга қамалгани, Деҳқонободда бошқарувни йўқотган Cobalt ҳайдовчиси эса «Жигули»га урилиши оқибатида «Жигули» ҳайдовчиси воқеа жойида вафот этгани ҳақида хабар берилганди.
Изоҳ (0)