Hyundai компанияси ўлчами жиҳатидан уч эшикли Lada Niva Legend каби бўлган ихчам кроссоверининг тизери билан бўлишди. Ҳозирча завод ичида АХ1 дея номланган модель юмалоқ шаклдаги ноодатий фаралар ҳамда кўплаб учбурчаклардан иборат тасвирлар туширилган орқа фонарларга эга бўлади, деб ёзади Motor.
Янги модель ҳақида ҳозирча маълумотлар жуда кам. Катта эҳтимол билан кроссовеер К1 архитектурасида қурилган, шунингдек, унинг асосини Santro ва Auro ташкил этган бўлиши мумкин. Машина капоти остидан ҳажми 1,1 ёки 1,2 литр бўлган иккита бензин мотордан бири ўрин олган. АХ1 мутлақо олд узатмали бўлади, унинг тўлиқ узатмали варианти яратилмайди.
Олдинроқ эълон қилинган суратларда кроссовер ихчам Hyundai Venue’ни ёдга солган эди, бироқ янги тизерга кўра, АХ1 ностандарт икки қаватли оптикага эга эсда қоларли дизайнга эга бўлади. Шу билан бирга, янги модель Venue’дан бир поғона пастда бўлиб, у Hyundai линейкасидаги энг ихчам кроссоверга айланади. Дастлабки маълумотларга кўра, машинанинг узунлиги 3,7—3,8 метрни ташкил этади.
Кроссоверни йиғиш билан Жанубий Кореянинг Кванжу шаҳридаги Hyundai Motor Company заводи шуғулланиб, бу ерда ушбу моделдан йилига 70 минг нусха ишлаб чиқарилади. Норасмий маълумотларга кўра, моделнинг бошланғич нархи 7 миллион вонни (6,2 минг доллар) ташкил этади.
Аввалроқ Hyundai Creta’нинг етти ўриндиқли версиясининг расмий видеоси пайдо бўлгани тўғрисида хабар берилганди.
Изоҳ (0)