Сўнгги вақтларда ижтимоий тармоқларда Россиянинг «Спутник V» вакцинаси Ўзбекистонга амалдорлар учун олиб келинган, деган хабарлар пайдо бўлди. Бунга ушбу вакцина билан эмланиш учун тиббиёт бўлимларига мурожаат қилган аксарият фуқароларга рад жавоби берилаётгани сабаб бўлган. ССВ ҳузуридаги Санитария-эпидемиологик осойишталик ва жамоат саломатлиги хизмати раҳбари ўринбосари Ботир Қурбонов бунга муносабат билдирди.
«Тошкент шаҳрида мавжуд эмлаш марказларига ёки эмлаш пунктларига мурожаат қилаётган айрим шахслар ёши 65 ёшдан кам бўлганлиги учун эмланмаётганлиги тўғрисидаги эътирозлар бор. Бир неча маротаба бизни ўзимизга ҳам мурожаат қилишган: ‘мен ‘Спутник V’ вакцинаси билан эмланмоқчиман, эмлаш марказига ёки эмлаш пунктига борсам мени қайтаришди’ дейишади. Биринчи навбатда ёши нечадалигини сўраймиз. Ёши 60 да, 50 да, 40 да. Кейинги босқичларда эса эмлаш контингенти ёки жамоаси ўзгаради. Лекин, ҳозирги кунда 65 ёшдан катталарни ихтиёрий равишда, бевосита 3 та вакцинадан бирини танлаган ҳолда эмланиши кўрсатилган», — деган СЭХ раҳбари ўринбосари 6 май куни COVID-19 қарши эмлаш йўналишида қилинаётган ишлар таҳлилига бағишланган матбуот анжуманида.
Ботир Қурбоновнинг қўшимча қилишича, бугунги кунда қадар Тошкентда 23 минг киши «Спутник V» билан эмланди. Бугун ва эртадан бошлаб республиканинг барча ҳудудларига ушбу вакцинанинг юборилиши кўзда тутилган.
Эслатиб ўтамиз, 1 май куни Олий Мажлис Қонунчилик палатаси спикери ўринбосари Одилжон Тожиев (1984 йилда туғилган) ўзининг Telegram каналида «Спутник V» билан эмланганини маълум қилганди.
6 май куни у коронавирусга қарши «Спутник V» вакцинасини соғлиғи билан боғлиқ заруратга кўра олганини билдирди.
Маълумот учун, Ўзбекистонда коронавирусга қарши биринчи навбатда эмланадиган фуқаролар қаторига сурункали касалликлари бор аҳоли ҳам киритилган.
Ўзбекистонга «Спутник V» вакцинасининг биринчи партияси 23 апрелга ўтар кечаси етказиб берилган эди (айнан қанча миқдорда вакцина олиб келингани маълум қилинмаган). Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. 31 март куни ушбу вакцинадан жами 1 миллион доза сотиб олиниши кўзда тутилгани маълум қилинганди.
Изоҳ (0)