«Мактаб ўқитувчиларига янги адабиёт ва қўлланмаларни сотиб олиш учун бюджетдан 1 миллион сўмдан маблағ ажратилади» – Шавкат Мирзиёев

Янги ўқув йилидан бошлаб мактаб ўқитувчиларига янги адабиёт ва қўлланмаларни сотиб олиш учун бюджетдан 1 миллион сўмдан маблағ ажратилади. Бу ҳақда Шавкат Мирзиёев раислигида ўтказилган чет тилларини янада ривожлантиришга бағишланган видеоселектор йиғилишида маълум қилинди, дея хабар қилмоқда «Дарё» мухбири.

«Мактаб ва олийгоҳларда ўқитиш сифатини ошириш учун халқаро андозаларга мос дарслик ва методик қўлланмаларни жорий этишимиз керак.

Шерзод Шерматов янги ўқув йилидан Герсен университети билан ҳамкорликда ишлаб чиқилаётган 2-синф учун рус тили дарслиги ва ўқув методикаларини барча мактабларда жорий этилишини таъминласин.

Шунингдек, инглиз тили бўйича Кембриж университети нашриёти дарсликларини 200 та мактабда апробациядан ўтказиб, кейинги йилдан барча мактабларда татбиқ қилсин. Йил якунига қадар бу ишларни немис, корейс, хитой ва француз тиллари бўйича ҳам ташкил этиш лозим.

Шу билан бирга, ўқитувчиларимиз ўз соҳасида бўлаётган ўзгаришлар, янги адабиёт ва қўлланмалардан мунтазам хабардор бўлиб боришлари керак.

Бунинг учун янги ўқув йилидан бошлаб, мактаб ўқитувчиларига янги адабиёт ва қўлланмаларни сотиб олиш учун бюджетдан 1 миллион сўмдан маблағ ажратилади (53 минг ўқитувчига йилига жами 53 миллиард сўм).

Шу каби, Мактабгача таълим вазирлиги (Шин) ЮНИСЕФ билан ҳамкорликда йил якунига қадар 7 ёшгача болаларга чет тилларини ўқитиш бўйича услубий қўлланма ишлаб чиқиб, боғчаларда жорий этилишини таъминласин», – деди Шавкат Мирзиёев.

Бундан аввал Шавкат Мирзиёев Ўзбекистондаги таълим масканларига хорижлик ўқитувчилар жалб қилинишини, ЖИДУда БМТ билан ҳамкорликда Чет тилларини чуқур ўргатиш маркази ҳамда Хорижий тилларни ўрганишни оммалаштириш агентлиги ташкил этилишини маълум қилганди.