Вилоят, туман ва шаҳар ҳокимлари 1 июлдан бошлаб қишлоқ туманларида 5 тадан чет тилларига ўқитиш нодавлат ўқув марказларини ташкил этиш бўйича танлов эълон қилинади. Бу ҳақда Президент Шавкат Мирзиёев раислигида ўтказилган йиғилишда сўз юритилди, дея хабар бермоқда «Дарё» мухбири.
«Республикада чет тиллари нодавлат ўқув марказларининг асосий қисми Тошкент шаҳрида жойлашган. Шунинг учун вилоят, туман ва шаҳар ҳокимлари 1 июлдан бошлаб қишлоқ туманларида 5 тадан чет тилларига ўқитиш нодавлат ўқув марказларини ташкил этиш бўйича танлов эълон қилсин.
Қишлоқ жойларида нодавлат ўқув марказлари ташкил этиш учун бўш бино ажратиш, керакли жиҳозлар ва адабиётлар сотиб олишга 50 миллион сўмгача бир марталик беғараз кўмак ажратиш йўлга қўйилсин.
Бундан ташқари, Шерматов, Тошкенбоев, вилоят ҳокимлари нодавлат таълим ташкилотлари билан ҳамкорликда чет тили олимпиадаларини йўлга қўйсин. Масъул ташкилот раҳбарлари икки ҳафта муддатда нодавлат таълим ташкилотлари ва хусусий мактаблар фаолиятини рағбатлантириш бўйича қарор лойиҳасини киритади. Бунда, кредит фоизлари харажатларининг бир қисми Тадбиркорликни қўллаб-қувватлаш жамғармаси ҳисобидан қоплаб берилади.
Шунингдек, ижарада турган ўқув марказлари ижара тўлови харажатларининг 50 фоизгача қисмига субсидия ажратилади ҳамда давлат мулки объектларида фаолият юритувчи ташкилотлар ижара тўловидан озод этилади», – деди Шавкат Мирзиёев.
Мавзуга доир:
- Ўзбекистондаги таълим масканларига хорижлик ўқитувчилар жалб қилинади
- «2022 йилдан ишга қабул қилинаётган чет тили ўқитувчиларидан миллий ва халқаро сертификатга эга бўлиш талаб қилинади» — Шавкат Мирзиёев
- «Чет тиллари бўйича юқори кўрсаткичларга эришган мактаблар учун Президент соврини таъсис этилади» — Шавкат Мирзиёев
- «Таълим тизимида 2 мингдан ортиқ чет тили ўқитувчилари лавозими вакант бўлиб қолмоқда» — Шавкат Мирзиёев
- Шавкат Мирзиёев: «Таълим муассасалари битирувчилари камида 2 та чет тилини мукаммал билиши шарт»
Изоҳ (0)