Вилоят ҳокимлари ўз бюджетидан мактабларда чет тилини ўқитиш сифатини ошириш учун ҳар бир туман ва шаҳарга 1 миллиард сўмдан маблағ ажратади. Бу ҳақда Президент Шавкат Мирзиёев раислигида ўтказилган йиғилишда сўз юритилди, дея хабар бермоқда «Дарё» мухбири.
«Беҳзод Мусаев, Шерзод Шерматов вилоят, туман ва шаҳарлар ҳокимлари билан бирга, 2021 йил 1 сентябрга қадар танлаб олинган жами 207 та мактабда барча шароитларни яратиб, чет тилларини чуқур ўргатишни бошлайди. Ушбу мактабларда хорижий китоблар, илғор ўқув дастурлари ва методикаларидан эркин фойдаланиш ҳамда фанларни чет тилида ўқитиш йўлга қўйилади.
Вилоят, туман ва шаҳар ҳокимлари Халқ таълими вазирлиги ва янги агентлик билан бирга ушбу мактабларни зарур адабиётлар, ўқув дастурлари ва қуроллари ҳамда техника воситалари билан жиҳозлашга масъул бўлади.
Умуман, Нуробод тажрибасидан келиб чиқиб, вилоят ҳокимлари ўз бюджетидан мактабларда чет тилини ўқитиш сифатини ошириш учун ҳар бир туман ва шаҳарга 1 миллиард сўмдан маблағ ажратиши керак.
Масъул ташкилот раҳбарлари янги агентлик билан бирга, бир ой муддатда ҳар бир ихтисослашган мактабга хорижий, айниқса, Осиё давлатларидан камида 2-3 нафардан, олийгоҳларга эса камида 5 нафардан тил эгаси бўлган малакали ўқитувчиларни жалб қилиш бўйича дастур ишлаб чиқсин.
Мактабларнинг чет эл мутахассисларини жалб қилиш харажатлари маҳаллий бюджетдан, олийгоҳларда эса ўзининг жамғармаси ҳисобидан қоплаб берилади», – деди Шавкат Мирзиёев.
Бундан аввал Ўзбекистонда Хорижий тилларни ўрганишни оммалаштириш агентлиги ташкил этилиши, таълим муассасалари битирувчилари камида 2 та чет тилини мукаммал билиши шартлиги, таълим тизимида 2 мингдан ортиқ чет тили ўқитувчилари лавозими вакант бўлиб қолаётгани ҳамда чет тиллари бўйича юқори кўрсаткичларга эришган мактаблар учун Президент соврини таъсис этилиши ҳақида хабар берилганди.
Изоҳ (0)