Кейинги 3 йилда мактаблардаги жами 53 минг нафар чет тили ўқитувчилари халқаро сертификат олишлари зарур. Бу ҳақда айни пайтда Президент Шавкат Мирзиёев раислигида ўтказилаётган йиғилишда сўз юритилди, дея хабар бермоқда «Дарё» мухбири.
«Малакали ўқитувчиларга муносиб шароит яратиб беришни давом эттирамиз. Бундан буён хорижий тиллар ўқитувчиларининг ойлик маоши уларнинг малакасига қараб белгиланади.
Халқаро сертификатни дастлабки ва ўрта даражада олган ўқитувчиларга – 40 фоиз ва юқори натижа кўрсатганларга 50 фоиз устама белгиланади. Бунда, юқори балл олган ўқитувчиларга халқаро сертификат олиш учун тест топшириш харажатлари қоплаб берилади (бир кишига ўртача 2 миллион сўм). Молия вазири Тимур Ишметов ушбу мақсадлар учун 2021 йилда 50 миллиард сўм ажратади.
Келгуси йилдан бошлаб янгидан ишга қабул қилинаётган чет тили ўқитувчиларига миллий ва халқаро сертификатга эга бўлиш талаби киритилади. Кейинги 3 йил давомида мактаблардаги жами 53 минг нафар чет тили ўқитувчиси халқаро сертификат олиши зарур.
Ушбу ишларга хусусий таълим ташкилотларини ҳам фаол жалб қилиб, юқори балл олган ўқитувчиларга ўқиш харажатларининг бир қисмини қоплаб бериш тизими йўлга қўйилади», – деди Президент.
Давлат раҳбари халқ таълими вазири Шерзод Шерматовга вилоят, туман ва шаҳар ҳокимлари билан бирга, икки ой муддатда яратиладиган қўшимча имкониятлардан фойдаланиб, 1 минг 300 та вакант ўринларни малакали мутахассислар билан тўлдириш топшириғини берди.
Бундан аввал Ўзбекистонда Хорижий тилларни ўрганишни оммалаштириш агентлиги ташкил этилиши, таълим муассасалари битирувчилари камида 2 та чет тилини мукаммал билиши шартлиги, таълим тизимида 2 мингдан ортиқ чет тили ўқитувчилари лавозими вакант бўлиб қолаётгани ҳамда чет тиллари бўйича юқори кўрсаткичларга эришган мактаблар учун Президент соврини таъсис этилиши ҳақида хабар берилганди.
Изоҳ (0)