Чет тиллари бўйича юқори кўрсаткичларга эришган мактаблар учун Президент соврини таъсис этилади. Бу ҳақда Президент Шавкат Мирзиёев раислигида ўтказилган йиғилишда сўз юритилди, дея хабар бермоқда «Дарё» мухбири.
«Вилоят ҳокимлари кейинги ўқув йилидан бошлаб ҳар бир туманда танлов ўтказиб, камида 2 нафардан инглиз тили ва 1 нафардан бошқа чет тили ўқитувчиларининг хорижда малака оширишини йўлга қўяди.
Бундан ташқари, 2021 йилдан бошлаб чет тиллари бўйича энг яхши кўрсаткичларга эришган мактабларни рағбатлантириш учун Президент соврини таъсис этилади. Бунда, туман, шаҳар, вилоят ва республика даражасида мактаблар ўртасида мусобақалар ўтказилади.
Туман ва шаҳар босқичида 1-ўринни олган мактаб 100 миллион сўм, 2-ўрин –75 миллион сўм, 3-ўрин – 50 миллион сўмдан мукофотланади. Вилоят босқичида 1-ўрин – 250 миллион сўм, 2-ўрин – 200 миллион сўм, 3-ўрин – 150 миллион сўмдан тақдирланади. Республикадаги энг яхши мактаб 500 миллион сўм, 2-ўриндаги – 400 миллион сўм, 3-ўриндаги – 300 миллион сўмдан рағбатлантирилади.
Бундан ташқари, ушбу мактабларнинг директорлари ва чет тили фани ўқитувчилари давлат мукофотларига ҳам тавсия этилади», – деди давлат раҳбари.
Президент масъул ташкилот раҳбарларига бир ой муддатда ушбу тизимни жорий этиш бўйича қарор лойиҳасини киритиш бўйича топшириқ берди.
Бундан аввал Ўзбекистонда Хорижий тилларни ўрганишни оммалаштириш агентлиги ташкил этилиши, таълим муассасалари битирувчилари камида 2 та чет тилини мукаммал билиши шартлиги ҳамда таълим тизимида 2 мингдан ортиқ чет тили ўқитувчилари лавозими вакант бўлиб қолаётгани ҳақида маълум қилинганди.
Изоҳ (0)