Uzbekistan Airways меҳнат муҳожирларига чегирмаларни бекор қилади. Бу ҳақда Президент қарори билан тасдиқланган Uzbekistan Airways’ни трансформация қилишни тезлаштириш борасидаги «йўл харитаси»га таяниб, Spot хабар берди.
2018 йилнинг баҳоридан «Ўзбекистон ҳаво йўллари» меҳнат муҳожирларига эконом-классдаги авиачипталар учун 20 фоизли чегирмалар тақдим этишни бошлади. Бу шу йилнинг январида ўнлаб ўзбекистонлик меҳнат муҳожирлари Қозоғистон ғарбида автобус ёниб кетиши оқибатида ҳалок бўлганидан сўнг амалга оширилди.
Уч йилдан ортиқ амалда бўлган чегирмаларни «йўл харитаси» билан 2021 йилнинг июнидан бекор қилиш кўзда тутилган. Таъкидланишича, бу авиакомпания даромадларини оширишга хизмат қилади.
Аввалроқ Uzbekistan Airways фаолияти самарадорлигини ошириш бўйича Жаҳон банки билан ҳамкорликда амалга ошириладиган ишлар орқали жами харажатларни 46,5 миллион долларга қисқартириш режалаштирилгани тўғрисида хабар берилганди.
Мавзуга доир: «Uzbekistan Airways’ни сотиш бўйича режалар бор, бироқ ҳозир мавриди эмас» — транспорт вазири
Изоҳ (0)