Сирдарё вилояти Гулистон шаҳрида «Тўхташ мумкин эмас» йўл белгисини қора бўёқ билан бўяб қўйган 23 ёшли йигитга чора кўрилди. Бу ҳақда ИИВ матбуот хизмати хабар берди.
Маълум бўлишича, ушбу фуқаро «40» тезлик чегараси белгиланган йўл белгисининг устига «Тўхташ мумкин эмас» ёрлиғини ёпиштириб, уни бўяганини тасвирга олган ва видеони ижтимоий тармоқлардаги саҳифасига жойлаштирган.
«Instagram’да видео тарқалиб кетди. Қилган ишларимдан пушаймонман», — дейди йигит.
Сирдарё вилояти ИИБ саъй-ҳаракатлари билан ҳуқуқбузар шахсига аниқлик киритилган ва иш Жиноят ишлари бўйича Гулистон шаҳар судида кўриб чиқилган.
Йигит Маъмурий жавобгарлик тўғрисидаги 183-моддани (майда безорилик) бўйича айбдор деб топилиб, унга нисбатан 15 сутка маъмурий қамоқ жазоси тайинланган.
Аввалроқ Гулистондаги чорраҳада рақсга тушган тиктокчи йигитлар жаримага тортилиб, 4 суткага қамалгани, Фарғонадаги мактабнинг синфхонасида пиротехника портлатган ўқувчи ИИБ рўйхатига олингани ҳамда Андижонда тунда хиёбон ўриндиқларини ағдариб, тўсиқлар, чиқинди урналари ва чироқларни тепиб, TikTok учун видео олган безориларга чора кўрилгани ҳақида хабар берилганди.
Изоҳ (0)