Ўзбекистон давлат бюджетидан 2021 йилнинг дастлабки уч ойида 200 млрд сўмдан ортиқ пул ноқонуний сарфланган

Ўзбекистон Молия вазирлиги 2021 йилнинг 1-чорагида бюджет маблағлари мақсадли сарфланиши юзасидан Давлат молиявий назорати департаменти ва унинг ҳудудий бошқармалари томонидан ўтказилган назорат ишлари натижасини эълон қилди.

Назорат тадбирларида 211,2 миллиард сўм миқдорида бюджет интизомини бузиш, пул ва товар-моддий бойликлар камомади ва асоссиз харажатлар аниқланган. Шундан 192,3 миллиард сўм бюджетга қайтарилган.

Халқ таълими вазирлиги тизимида 43,3 миллиард сўм миқдорида қонунбузилиш ҳолатлари аниқланиб, бу 2020 йил 1-чорагига (9,4 миллиард сўм) нисбатан 4,6 мартага кўп.

Соғлиқни сақлаш вазирлиги тизимида 23,3 миллиард сўм миқдорида қонунбузилиш ҳолатлари аниқланиб, бу 2020 йилнинг шу даврига (7,9 миллиард сўм) нисбатан 2,9 мартага ошган.

Мактабгача таълим вазирлиги тизимида 41,2 миллиард сўм миқдорида қонунбузилиш ҳолатлари аниқланиб, 2020 йил 1-чорагига (5,4 миллиард сўм) нисбатан қонунбузилиш ҳолатлари 7,6 мартага ошган.

Уй-жой коммунал хизмат кўрсатиш вазирлиги тизимида 22,4 миллиард сўм миқдорида қонунбузилиш ҳолатлари аниқланган (2020 йил 1-чоракда 135,4 миллион сўмлик қонунбузилиш ҳолатлари аниқланган).

Транспорт вазирлиги ҳузуридаги Автомобиль йўллари қўмитаси тизимида 16,1 миллиард сўм миқдорида қонунбузилиш ҳолатлари аниқланган (2020 йил 1-чоракда 767 миллион сўмлик қонунбузилиш ҳолатлари аниқланган).

Шунингдек, Қишлоқ хўжалиги (3,3 миллиард сўм), Жисмоний тарбия ва спорт (3 миллиард сўм), Бандлик ва меҳнат муносабатлари (2,7 миллиард сўм), Сув хўжалиги (2,5 миллиард сўм), Олий ва ўрта махсус таълими (2,2 миллиард сўм) вазирликлари, Ўрмон хўжалиги давлат қўмитаси (2,7 миллиард сўм) ва улар тизимидаги бюджет ташкилотларида ҳам йирик миқдорда молиявий қонунбузилиш ҳолатлари аниқланган.

Бундан ташқари, ҳокимиятлар (3,4 миллиард сўм), ҳокимликларнинг ободонлаштириш бошқармалари (2,9 миллиард сўм), ҳокимиятлар ҳузуридаги «Ягона буюртмачи хизмати» инжиниринг компаниялари (34,2 миллиард сўм)да ўтказилган назорат тадбирларида ҳам молиявий қонунбузилиш ҳолатларига йўл қўйилганлиги аниқланган.

Бюджет қонунчилигини бузганлиги учун бюджетдан маблағ олувчи ташкилотларнинг 9 нафар раҳбар ва бошқа мансабдор шахсларига маъмурий ҳуқуқбузарлик тўғрисидаги баённомалар тузилиб, кўриб чиқиш учун Маъмурий судларга юборилган. Шунингдек, 1458 та назорат тадбирида аниқланган 210,1 миллиард сўмлик қонунбузилиш ҳолатларига қонуний чоралар кўриш учун ҳуқуқни муҳофаза қилувчи органларга юборилган.