“O‘zbekistonda 2020-yilda 671 mlrd so‘mlik talon-torojlik holatlari aniqlangan” — Hisob palatasi
Davlat budjeti va davlat maqsadli jamg‘armalari budjetlari hisobidan ajratilgan 671,3 milliard so‘mlik mablag‘lar noqonuniy xarajatlar, kamomad va o‘zlashtirishlar hamda samarasiz xarajatlar, 1 trillion so‘mdan ortiq xarajatlarni optimallashtirish imkoniyatlari aniqlangan. Bu haqda Oliy Majlis Qonunchilik palatasining navbatdagi majlisida Hisob palatasining 2020-yilgi faoliyati to‘g‘risidagi hisobotida ma’lum qilindi.
Ma’lum qilinishicha, Inqirozga qarshi kurashish jamg‘armasidan ajratilgan mablag‘lar sarflanishi ustidan Moliya vazirligi bilan hamkorlikda doimiy nazorat o‘rnatilib, aniqlangan 23,8 milliard so‘mlik kamomad va noqonuniy xarajatlar hamda ortiqcha moliyalashtirilgan 8,4 milliard so‘m mablag‘lar jamg‘armaga qaytarilgan.
Shu bilan birga, Xalq ta’limi vazirligi muassasalarida 192,2 milliard so‘mlik moliyaviy xato, kamchiliklar va o‘zlashtirishlar aniqlangan. Jumladan, Beruniy tumanidagi 420 million so‘mga qurilib, foydalanishga qabul qilinganligi ko‘rsatilgan 58-maktab filialida umuman qurilish bo‘lmaganligi aniqlangan.
Muhokamalarda, shuningdek, hisobotda keltirilgan xalqaro moliya tashkilotlari mablag‘lari hisobidan amalga oshirilayotgan loyihalarda muammolar mavjudligiga ham e’tibor qaratildi. Jumladan, davlat tashqi qarz mablag‘larini jalb qilgan holda 2010—2019-yillarda yakunlangan umumiy qiymati 12,6 milliard dollarlik 81 ta loyihaning 24 tasida xato va kamchiliklar aniqlangan.
Ayrim loyihalar yillab kechiktirilgan, shuningdek, loyihada ko‘zda tutilgan maqsadlar doimiy o‘zgartirilgan yoki sifatsiz asbob-uskuna va jihozlar qimmat narxlarda sotib olinganligi, ba’zi loyihalarning samaradorlik ko‘rsatkichlari o‘ta past darajada hamda loyiha mablag‘lari talon-toroj qilinib, o‘zlashtirilganligi aytib o‘tildi.
Bundan avval Yashnoboddagi ichki yo‘llarning qurilishi va ta’mirlanishidagi talon-torojlik fosh etilgani, Sog‘liqni saqlash sohasida 30 milliard so‘mdan ortiq mablag‘ talon-toroj qilingani hamda Buxoroda bandlik markazi mansabdorlari 134 million so‘m budjet mablag‘larini talon-toroj qilgani ma’lum bo‘lgani haqida xabar berilgandi.
