Арманистон бош вазири Никол Пашинян ва унинг рафиқаси коронавирусга қарши эмланди

Арманистон бош вазири вазифасини бажарувчи Никол Пашинян ва унинг рафиқаси Анна Акопян коронавирусга қарши эмланди. Бу ҳақда Пашинян Facebook саҳифасига жойлаган видео орқали маълум қилди, деб ёзади «РБК».

«Бугун Анна билан коронавирусга қарши эмландик. Биз фуқароларимизни касалхоналардан фаол фойдаланишга ва эмланишга чақирамиз», — дейилади видеохабар изоҳида.

Кадрларда жараён қандай амалга оширилаётгани акс этган, хусусан, мамлакат бош вазири рафиқаси билан тиббий муассасага етиб келгани, шифокорлар уларнинг қон босимини ўлчагани, шундан сўнг вакцина юборгани каби. Пашинян ва Акопян қандай вакцина билан эмлангани ҳақида маълумот берилмаган.

Пашинян фуқароларга 2021 йилнинг иккинчи ярмида етакчи мамлакатлар эмланмаганлар учун чекловлар киритиши мумкинлигини эслатиб ўтди.

Февраль ойи бошида Арманистон Соғлиқни сақлаш вазирлиги Россиянинг «Спутник V» коронавирусга қарши вакцинасини тасдиқлаган эди. Россия вакцинасининг 15 минг дозадан иборат биринчи партияси Арманистонга 8 апрелда етказиб берилган. «Спутник V»дан ташқари, мамлакатда яна иккита вакцина — AstraZeneca ва Pfizer’дан фойдаланиш маъқулланган.

Арманистонда коронавирусга қарши кураш доирасида 11 июлгача карантин эълон қилинган. Мамлакат Соғлиқни сақлаш вазирлиги маълум қилишича, 3 май ҳолатига кўра, мамлакатда 217 мингдан ортиқ кишида коронавирус қайд этилган. Беморларнинг 200 мингдан ортиғи соғайган, 4,1 минг киши вафот этган. Арманистонда сўнгги бир кеча-кундузда 145 кишида COVID-19 аниқланган.

25 апрель куни Пашинян бош вазир лавозимидан истеъфога чиққан эди. Пашиняннинг аниқлик киритишича, 20 июнда бўлиб ўтадиган парламентга навбатдан ташқари сайловларгача у ҳукумат раҳбари вазифасини вақтинчалик бажарувчи бўлиб туради.

Арманистон парламентининг «Менинг қадамим» ҳукмрон фракцияси мамлакат бош вазири вазифасини бажарувчи Никол Пашинян номзодини бош вазир лавозимига кўрсатди. Бу муддатидан илгари ўтказиладиган парламент сайлови учун номзоднинг расман илгари сурилишидир.  Арманистон конституциясига кўра, агар парламент бош вазирни иккинчи муддатга сайламаса, навбатдан ташқари парламент сайловлари ўтказилиши мумкин.

«Айнан шу мақсадда (бош вазирни икки марта сайламаслик ва навбатдан ташқари парламент сайловларини ўтказиш) ‘Менинг қадамим’ блоки Никол Пашинян номзодини илгари сурди», — дея Пашиняннинг сўзларини келтирди «Спутник Армения».

Аввалроқ Арманистон бош вазири Никол Пашиняннинг мамлакат жанубидаги Агардак шаҳрига ишчи сафари чоғида бир неча юзлаб маҳаллий аҳоли унинг ташрифига қарши норозилик намойиши ўтказган эди.