Ҳиндистондаги коронавирус инфекциясининг тарқалишини бартараф этиш учун Ўзбекистон инсонпарварлик ёрдамини юбориши ҳақида хабар берилган эди. Шавкат Мирзиёев топшириғига кўра, 1 май куни Деҳли шаҳрига инсонпарварлик кўмаги етказилди, деб хабар бермоқда «Дунё» АА.
Қайд этилишича, мобил кислород концентраторлари тўпламлари, эҳтиёж юқори бўлган турли дори воситаларидан таркиб топган инсонпарварлик юклари Деҳли аэропортида Ўзбекистоннинг Ҳиндистондаги элчиси Дилшод Аҳатов томонидан мазкур мамлакат Қизил Хоч жамияти ва Ташқи ишлар вазирлиги расмий вакилларига топширилди.
Айни пайтда Ҳиндистонда оғир эпидемиологик вазият кузатилмоқда. Мамлакатда COVID-19’га чалиниш бўйича жаҳон рекорди кетма-кет янгиланмоқда. Мамлакатдаги эпидемиологик вазият «коронавирус бўрони» деб таърифланди.
Ҳиндистон Ташқи ишлар вазирлиги Евросиё департаменти директори ўринбосари Бандару Вилсонбабу Ҳиндистондаги жорий санитар-эпидемиологик ҳолат кескин оғирлашган бир вақтда Ўзбекистон раҳбарияти томонидан биринчилардан бўлиб инсонпарварлик ёрдамини юбориш ҳақида қарор қабул қилингани Ўзбекистоннинг халқаро ҳамжамият олдида фаол ҳамкорлик ва ўзаро қўллаб-қувватлаш тамойилларига содиқ эканини намойиш этиш билан бирга Ўзбекистон ва Ҳиндистон ўртасидаги мавжуд стратегик шерикчилик алоқаларининг амалдаги яққол исботи эканини эътироф этган.
Ҳиндистоннинг Ўзбекистондаги элчихонаси Ҳиндистон ҳукумати ўз вақтида кўрсатилган ёрдам учун миннатдорлик билдириб, Ўзбекистон Президенти Шавкат Мирзиёев топшириғи билан бу оғир дамда фавқулодда ёрдам сифатида юборилган материаллар самимий хайрихоҳлик белгиси ўрнида қадрлашини маълум қилди. Пандемия инқирози даврида гуманитар ҳамкорлик Ҳиндистон ва Ўзбекистон ўртасидаги ҳамкорликнинг муҳим йўналишларидан бири экани алоҳида таъкидланди.
1 май куни Ўзбекистон томонидан етказиб берилган инсонпарварлик ёрдами Ҳиндистоннинг қатор етакчи оммавий ахборот воситаларида, хусусан Times of India, АNINews, ZeeNews ва бошқаларда кенг ёритилган.
Эслатиб ўтамиз, Ҳиндистон 2020 йилда Ўзбекистонга COVID-19 билан оғриган одамларни даволаш учун ишлатиладиган тиббий препаратлар, жумладан, гидрокциклорокин таблеткалари ва бошқа дори-дармонлар юборганди. 2021 йилнинг март ойида Ўзбекистон COVAX ташаббуси доирасида Ҳиндистон зардоб институти томонидан ишлаб чиқарилган 660 минг доза вакцинани қабул қилиб олганди. Унинг навбатдаги партияси июнь ойида олиб келинади.
Изоҳ (0)