7 ойда 41 кило вазн ташлаган ҳиндистонлик эркак озиш сирлари билан ўртоқлашди

Ҳиндистоннинг Панжоб штати Лудҳиана шаҳрида яшовчи, 7 ойда 41 килограмм вазн ташлаган эркак муваффақиятининг учта сирини айтиб ўтди. The Times of India газетасининг ёзишича, бундай натижага эришиши учун унга жисмоний машғулотлар, тўғри овқатланиш ва тартиб-интизом ёрдам берган.

Аввалроқ 39 ёшли Рамит Аггарвалнинг вазни 123 килограмм бўлган. У нафас қисиши бошлангани ва шифокорларнинг огоҳлантиришлари туфайли озишга қарор қилади. «Мен соғлиғимни хавф остига қўймасдан, оғриқсиз тарзда озишни хоҳладим», — дейди ҳиндистонлик эркак.

Аввало, у рационига ўзгартириш киритди. Уйқудан тургач, бир стакан илиқ сув ичиб, соат 9:30 да ёрма ёки гуруч унидан тайёрланган бўтқа каби енгил овқат истеъмол қилади. Тушликда эса мевали салат, бир ярим соатдан кейин нон билан сабзавотли рагу ейди. Соат 17:30 ларда Аггарвал битта печенье билан чой ичади. Тахминан икки соатдан кейин кечки овқатда икки бўлак қора нон билан катта ликопда сабзавотли салат билан кифояланади.

Бундан ташқари, Аггарвал ҳаракатланишни ҳам кўпайтирган. «Эрталаб саккиз минг қадам юраман ва 20-30 дақиқа давомида полда машқ қиламан, — дейди у. — Кечки соат 6 ларда тез юриш билан шуғулланиб, яна саккиз-ўн минг қадам юраман. Кунига камида 15000 қадам босиб, аэробик, кардио ва куч-қувват машқларини бажаришга ҳаракат қиламан». Ҳозирда Аггарвал ёга билан шуғулланишни ҳам бошлаган.

Ҳиндистонлик эркак шу билан тўхташ ниятида эмас. У 60-70 килограммгача вазн ташлашни ва вазнини бир хил даражада ушлаб туришни режалаштирмоқда.

Аввалроқ англиялик аёл биргина фото туфайли 38 кило вазн ташлагани ҳақида хабар берилган эди.