Ўтган ҳафта якунланган Шанхай автосалонида фақат Хитой бозори учун мўлжалланган Mercedes-Maybach S480 модели ҳам тақдим этилди, деб хабар беради CARakoom. Айримлар Европа ва Россия бозорида модель S450 номи остида пайдо бўлишини тахмин қилмоқда.
Модель S-класснинг двигателидан, яъни юмшоқ гибрид қувватловига эга 3,0 литрли бензин агрегатидан фойдалангани сабаб S450 номини олган. Двигателнинг жами қуввати 367 от кучи ва 500 Нм айланувчи моментни ташкил этади. Ушбу кўрсаткичлар Mercedes-Maybach S480 ва Mercedes-Benz S450’нинг муқобили ҳисобланади.
Бироқ Mercedes-Maybach S480 ўлчами ва оғирлиги сабаб S450’дан бироз секинроқ. Соатига 100 километр тезликка 5,8 сонияда эришади — S450’да ушбу кўрсаткич 5,1 сонияни ташкил этади. Машинанинг максимал тезлиги 250 километр/соат, ёқилғи сарфи эса 100 километрга 8,56 литрга тенг.
Mercedes-Maybach S480 модель қаторидаги энг арзон бўлишига қарамай, у қиммат версияларга хос ҳашаматли опцияларга эга. Моделнинг нархи расмий сайтда 1,458 миллион юанни ташкил этади. Айни вақтда бу Хитойда сотиладиган ягона Mercedes-Maybach S-класс ҳисобланади.
Кейинроқ унинг ёнидан 496 от кучини тақдим этишга қодир 4,0 литрли V8 моторли S580 ҳамда 621 от кучига эга 6,0 литрли V12 двигатели ўрнатилган S650 ўрин олиши кутилмоқда.
Аввалроқ Toyota компанияси Шанхай автосалони доирасида Crown Vellfire номли минивенини тақдим этгани тўғрисида хабар берилганди.
Изоҳ (0)