Сардоба сув омбори тўғоннинг шикастланган қисмида 800 метр узунликда дамба барпо этилиб, таъмирлаш-тиклаш ишларининг биринчи босқичи якунланди. Бу ҳақда фавқулодда вазиятлар вазирининг биринчи ўринбосари Абдулла Қўлдошев 30 апрель куни АОКАда ўтказилган махсус брифингда маълум қилди, деб хабар бермоқда «Дарё» мухбири Мадина Нурман.
Абдулла Қўлдошевнинг таъкидлашича, Франция, Голландия, Россия, Туркия, Қозоғистон ҳамда Ўзбекистоннинг юқори малакали экспертларининг таҳлил ва хулосалари асосида ўпирилиш сабаблари атрофлича ўрганиб чиқилиб, зарур чора-тадбирлар белгиланди.
Москва давлат қурилиш университети, «Қурилиш соҳасида муҳандислик изланишлари, геоахборот ва шаҳарсозлик кадастри» давлат илмий-тадқиқот лойиҳа институти томонидан тўғоннинг мустаҳкамлигини аниқлаш бўйича муҳандислик-қидирув изланишлари ва илмий-амалий тадқиқотлар олиб борилди.
«Хусусан, тўғон бўйлаб 45 метргача чуқурликда 60 та геологик тик қудуқлар қазилиб, 2100 та тупроқ намуналари олинди ҳамда замонавий лаборатория ускуналари ёрдамида уларнинг физик, механик ва кимёвий хусусиятлари ўрганилди; иншоотнинг деформациясини ўрганиш мақсадида тўғон бўйлаб 423 та махсус белги ва 21 та таянч геодезия нуқталари ўрнатилди; тўғондаги горизонтал силжишларни аниқлаш учун 444 та нуқтада халқаро ва давлат стандартлари асосида юқори аниқликдаги махсус ўлчовлар амалга оширилди», — деган Абдулла Қўлдошев.
Шунингдек, ФВВ вакилининг билдиришича, малакали мутахассислардан иборат махсус ишчи гуруҳлар тузилиб, республикадаги барча йирик гидротехник иншоотлар техник кўрикдан ўтказилган. Кўрик натижалари асосида уларнинг хавфсизлигини таъминлаш бўйича комплекс чора-тадбирлар ишлаб чиқилиб, амалга оширилмоқда.
Бу соҳадаги ишларни тизимли ташкил этиш мақсадида Вазирлар Маҳкамаси ҳузуридаги Сув хўжалиги объектлари хавфсизлигини назорат қилиш давлат инспекцияси ташкил этилди.
Эслатиб ўтамиз, Шавкат Мирзиёев 2020 йил 5 май куни бўлиб ўтган видеоселектор йиғилишида сув омбори масаласида халқаро экспертларни жалб этган ҳолда барча дамбалар чуқур экспертизадан ўтказилишини, шундан сўнг якуний хулоса чиқарилишини таъкидлаганди. Давлат раҳбари ўша ойда Сирдарё вилоятига сафари давомида Сардоба сув омборида 1 май куни юз берган авария сабабларини ўрганиш учун халқаро экспертлар гуруҳи чақирилганини маълум қилганди.
2021 йилнинг февралида Қурилиш вазирлигининг Лойиҳа-қидирув ташкилотлари фаолиятини мувофиқлаштириш бошқармаси бошлиғи Насрулло Бобоев Сардоба сув омбори қайта қурилиши, бу бўйича ҳукумат қарори қабул қилинганини айтганди.
Изоҳ (0)