Америкалик эркак айиқ костюмида пиёда 770 километр йўл босди (фото)

Америкалик Жесси Ларионс руҳий касалликларга қарши курашиш йўлида кўпроқ маблағ йиғиш мақсадида Лос-Анжелесдан Сан-Францискога айиқ костюмида пиёда йўлга чиқди, деб хабар беради «Korrespondent.net».

Таъкидланишича, тиббиёт компаниясининг 33 ёшли ходими ўзи билан телефон, фонар, пайпоқ ва гигиена воситаларидан ташқари ҳеч нарса олмаган. У 12 апрель куни йўлга чиқиб, тўққиз кун ичида 770 километр йўл босган.

Бу вақт давомида Лариос GoFundMe сайти орқали краудфандинг кампаниясини ўтказиб, руҳий касалликларга қарши курашиш учун маблағ тўплаган. Унга қарийб 17 минг доллар хайрия қилинган бўлиб, пуллар Руҳий касалликлар бўйича миллий альянсига ўтказиб берилади.

Шунингдек, эркак ўз саёҳатини Instagram’да ёритиб борган. Жессининг тан олишича, сафарга чиқиш борасидаги қарор анча импулсив бўлган ва учинчи куни у бундан афсуслана бошлаган. Бироқ ўзини ижтимоий тармоқларда кузатиб бораётган одамларнинг қўллаб-қувватлови билан у бошлаган ишини якунлаган.

Жесси бутун саёҳати давомида бирорта меҳмонхонада тўхтамаган, дам олишни истаганида эса йўл четида ухлаган. Айиқ кийимида эркак кўплаб маҳаллий шерифларнинг эътиборини тортган. У эришилган натижа билан чекланиб қолиш ниятида эмас ва яқин кунларда Лос-Анжелесдан Лас-Вегасга, кейин — Лос-Анжелесдан Нью-Йоркка боришни режалаштирмоқда.

Янги старт олдида у айиқ костюмини такомиллаштириб, уни анча «нафас олувчан» қилиш ниятида.