Yeezy’нинг биринчи кроссовкаси аукцион орқали тарихдаги энг юқори нархда сотилди

Америкалик рэпер Канье Уэстнинг Yeezy линейкасидаги илк кроссовка аукцион орқали тарихдаги энг юқори нархда сотилди, деб хабар беради France 24.

Гап ҳип-ҳоп ижрочи ва дизайнер Марк Смит ҳамкорлигида Nike маркаси учун 2007 йилда яратилган Nike Air Yeezy 1 кроссовкасининг биринчи прототипи ҳақида кетмоқда. Бир жуфт оёқ кийим табиий чармдан ишланган ва камар билан безатилган, шунингдек, Y ҳарфи кўринишидаги пушти илгакка эга.

Маълумотларга кўра, мусиқачи биринчи бор ушбу кроссовкаларда 2008 йили  Грэмми мукофотини топшириш маросимида кўриниш бериб, уни жамоатчиликка намойиш этган. Ушбу оёқ кийим савдоси эса 2009 йилнинг апрелида бошланган.

Sotheby’s кимошди уйи Nike Air Yeezy 1 кроссовкасини 12 апрель куни сотувга қўйган ва 26 апрель куни у 1,8 миллион долларга сотилган. Харидорнинг исми ошкор этилмаган, шу билан бирга, оёқ кийимни аукционга нью-йорклик коллекционер Райан Чанг тақдим этган.

Нашрнинг ёзишича, ушбу кроссовкалар ҳозирга қадар аукционлар бозори орқали сотилган энг қиммат оёқ кийимга айланган. «Шунингдек, уларнинг нархи миллион доллардан ошган биринчи оёқ кийимга айланди», — дея қўшимча қилади Sotheby’s.

Аввалроқ E-bay платформасида баскетболчи Майкл Жорданнинг имзоси туширилган Air Jordan 1 кроссовкалари сотувга қўйилгани, бир жуфт оёқ кийим нархи 1 миллион долларга баҳоланаётгани тўғрисида хабар берилганди.