Россиянинг коронавирусга қарши «Спутник V» вакцинаси билан эмлашнинг пуллик бўлиши ҳақидаги хабарлар ҳақиқатга мос келмайди, дея хабар берди Санитария-эпидемиология хизмати матбуот котиби Муҳаммаджон Бозоровга таяниб «Gazeta.uz».
Ижтимоий тармоқларда «Спутник V» вакцинаси билан эмлашнинг нархи 500 минг сўмгача эканлиги ҳақидаги хабарлар тарқалмоқда.
«Россиядан келтирилган ‘Спутник V’ вакцинаси пуллик бўлмайди. Бу маълумот ҳақиқатга тўғри келмайди. Биз ‘Спутник V’ вакцинаси билан эмлашни бошлашни энди режалаштиряпмиз», — деди матбуот котиби.
Муҳаммаджон Бозоров Ўзбекистон аҳолиси учун «Спутник V» вакцинаси, бошқа вакциналар қатори — хитой-ўзбек вакцинаси ZF-UZ-VAC2001 ва AstraZeneca (Ҳиндистонда ишлаб чиқарилган Covidshield) вакцинаси каби бепул бўлишини таъкидлади.
Биринчи босқичда вакцина билан 65 ёшдан катталар ва тиббиёт ходимлари эмланади.
Эслатиб ўтамиз, 27 апрель куни Ўзбекистонга «Спутник V» вакцинасининг иккинчи партияси 50 минг дозада олиб келинди.
Бундан аввал Тошкентга яна 1 млн доза ўзбек-хитой вакцинаси олиб келинганди.
Шунингдек, 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.
Ўзбекистонда 1 апрелдан 65 ёшдан катта шахслар ва тиббиёт ходимларини коронавирусга қарши ўзбек-хитой ZF-UZ-VAC2001 ва AstraZeneca вакциналари билан эмлаш жараёни бошланган эди. 26 апрель ҳолатига кўра, бутун мамлакат бўйича 565 мингдан ортиқ фуқаро коронавирусга қарши эмланган. Ҳукумат июнь ойи охиригача 4 миллионга яқин, йил охиригача 7 миллион аҳолини коронавирусга қарши эмлашни режалаштирган.
Маълумот учун, Ўзбекистонга шу вақтгача, «Спутник V»ни ҳисобга олмаса, яна 1,66 миллион доза вакцина олиб келинган. Уларнинг 660 минг дозаси COVAX тизими орқали олиб келинган AstraZeneca, қолган 1 миллиони Ўзбекистон ва Хитой ҳамкорлигида ишлаб чиқилган ZF-UZ-VAC 2001 вакцинасидир.
Изоҳ (0)