Ўзбекистонга 27 апрелга ўтар кечаси Россияда ишлаб чиқарилган «Спутник V» коронавирусга қарши вакцинасининг навбатдаги партияси етиб келди, дея хабар бермоқда Ўзбекистон Соғлиқни сақлаш вазирлиги матбуот хизмати. Аммо вазирлик айнан қанча вакцина олиб келинганини маълум қилмаган. Россиянинг Ўзбекистондаги элчихонасидан билдиришларича, вакцинанинг иккинчи компонентидан 50 минг доза олиб келинган.
Вазирликнинг қайд этишича, «яқин кунларда» ўзбек-хитой ZF-UZ-VAC2001 ва AstraZeneca вакциналарининг ҳам қўшимча дозалари етиб келиши керак. «Мамлакатимизда вакциналарни барча ҳудудларга тенг тақсимлаш тизими жорий қилинган бўлиб, биринчи навбатда хавф остида бўлган фуқаролар эмланмоқда», — дейилади ССВ ахборотида.
Аввалроқ 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.
Ўзбекистонда 1 апрелдан 65 ёшдан катта шахслар ва тиббиёт ходимларини коронавирусга қарши ўзбек-хитой ZF-UZ-VAC2001 ва AstraZeneca вакциналари билан эмлаш жараёни бошланган эди. 26 апрель ҳолатига кўра, бутун мамлакат бўйича 565 мингдан ортиқ фуқаро коронавирусга қарши эмланган. Ҳукумат июнь ойи охиригача 4 миллионга яқин, йил охиригача 7 миллион аҳолини коронавирусга қарши эмлашни режалаштирган.
Маълумот учун, Ўзбекистонга шу вақтгача, «Спутник V»ни ҳисобга олмаса, яна 1,66 миллион доза вакцина олиб келинган. Уларнинг 660 минг дозаси COVAX тизими орқали олиб келинган AstraZeneca, қолган 1 миллиони Ўзбекистон ва Хитой ҳамкорлигида ишлаб чиқилган ZF-UZ-VAC 2001 вакцинасидир.
Изоҳ (0)