Қашқадарё вилоятининг Муборак тумани ҳокимлигидаги фаолияти давомида карантинда тўй қилган шифокорлар ҳақида хабар бериб, ИИБ босимига учраган ва кейинчалик босимдан ишдан бўшаб қутулган собиқ матбуот котиби — Зафар Жўраев фирибгарликда айбланмоқда. Бироқ у судда айби бирор-бир далил билан асосланмаётганини айтиб, ҳақиқат талаб қилмоқда, дея хабар берди «Дарё» мухбири.
Таъкидланишича, ишга жойлаштириш ва фуқарога ер олиб беришни ваъда қилиб, катта миқдорда пул олганликда айбланган Муборак тумани ҳокимининг собиқ матбуот котиби Зафар Жўраев Жиноят ишлари бўйича Косон туман судининг 2021 йил 11 мартдаги ҳукмига кўра, иккита эпизод бўйича оқланган. Бироқ маълум бир ҳақ эвазига ер олиб беришни ваъда қилишда айбланиб, 2 йил 6 ой муддатга ахлоқ тузатиш билан жазоланган.
«Косон туман судига қадар терговда менга учта эпизод бўйича айблов қўйилди. Тергов давомида ИИБнинг Бекзод исмли терговчиси томонидан таҳқирландим. Қийноққа солиндим. Терговчи очиқчасига карантиндаги тўй ҳақида хабар берганимни, бу эса уларга қимматга тушганини эслатиб, қийноққа солишда давом этди. Ўша пайтда бу ҳақда масъулларга билдириб, терговга бормаслигимни, агар терговга мажбурлаб олиб боришса, ўзимга бирор нима қилиб қўйишимни айтдим. Хайрият, ўша пайт терговчини ўзгартиришди. Судда менга қўйилган учта эпизоднинг иккитаси асосланмади. Ва судда бу айбловларни олиб ташлашди. Аммо ер олиб бериш эвазига ўзгалардан пул олганликда айблашиб, 2 йил 6 ой муддатга ахлоқ тузатиш билан жазолашди. Лекин асос кўрсата олишмади. Судьядан бу ҳақда сўраганимда, шу иш бўйича жиноят иши очилганини, етарли асос бўлмаса-да, жазо тайинлашга мажбурлигини айтди. Шунинг учун сизга мурожаат қилдим. Сиз адолатни тиклаб беринг, деяпман», — дейди Жиноят ишлари бўйича вилоят судида сўнгги сўз айтиш имконини олган Зафар Жўраев.
Маълум бўлишича, карантиндаги тўй ҳақида хабар берган туман ҳокимининг собиқ матбуот котиби фуқароларни ишга жойлаштириш учун фирибгарлик йўли билан улардан 1 миллион сўм ва 1,5 минг доллар олишда, шунингдек ер олиб беришни ваъда қилиб, 2 миллион 400 минг сўм олишда айбланган.
«Тўғри, ўша пайтда эндигина иш бошлаганим, қолаверса, ойлик маош камлиги ва Қарши шаҳридан туманга қатнаб ишлаганим сабаб ўзимга таниш инсонлардан қарз олганман. Аммо қарз олиш давомида ишга жойлаштириш ёки ер олиб беришни ваъда қилмаганман. Ва бу иш менинг қўлимдан келмаслигини, ваколатимга кирмаслигини сиз ҳам яхши биласиз. Олган қарзларимни ўша танишларимга қайтардим. Улар ҳам ўша пайтдаги босим сабаб мени шундай айблашганини, туман ҳокимлигига устимдан шикоят қилиб борганда менга қарз беришганини айтганини айтишди. Бироқ, минг афсуслар бўлсинки, карантиндаги тўй ҳақидаги хабарим учун масъул ташкилотлар қаҳрига учрадим. Менга фирибгарлик айбини қўйишди. Қўлларида ҳеч қандай асос бўлмаса-да, 2 йил 6 ойга ахлоқ тузатиш билан жазолашди. Салкам олти ой давомида тергов ҳибсхонасида айбсиз ушлаб теришди. Менга адолат керак», — деди собиқ матбуот котиби.
Собиқ матбуот котибининг жиноят ишлари бўйича Косон туман суди ҳукмидан норозилигини кўриб чиқаётган жиноят ишлари бўйича Қашқадарё вилоят суди Зафар Жўраевга тайинланган ҳукмни қисман ўзгартиришни лозим деб топди. Унга кўра, Зафар Жўраевга тайинланган 2 йил 6 ой ахлоқ тузатиш жазоси унинг тергов ҳибсхонасида сақланган 6 ойлик муддатни ўтагани учун жазо ўталган деб ҳисобланиши белгиланди.
«Барибир менда судланган деган тамға қоляпти. Шунинг учун суд ҳукмидан норозилигимни билдириб, Олий судга шикоят киритаман», — дейди Зафар Жўраев.
Эслатиб ўтамиз, 2020 йилнинг 14 апрель куни Муборакда шифокорлар карантин тартиби амал қилаётганига қарамай, тўй ўтказгани ҳақида хабар берилган эди. Шундан сўнг бу ҳақда хабар берган туман ҳокимлиги ахборот хизмати раҳбари Зафар Жўраев ёлғон ахборот тарқатишда айбланганди.
Зафар Жўраев «Дарё» мухбири билан суҳбатда ИИБдаги сўроқ давомида унга овқат беришмагани, шу сабаб тоби қочганини айтган, «Бу хабар ортидан бир неча киши жазоланишини билган мутасаддилар барча айбни менга ағдариб, сувдан қуруқ чиқишга уринмоқда», деганди. Мазкур воқеалардан сўнг Муборак тумани ҳокими Ғайрат Жовлиев ҳам ишдан олинди.
Изоҳ (0)