O‘zbekistonga 27-aprelga o‘tar kechasi Rossiyada ishlab chiqarilgan “Sputnik V” koronavirusga qarshi vaksinasining navbatdagi partiyasi yetib keldi, deya xabar bermoqda O‘zbekiston Sog‘liqni saqlash vazirligi matbuot xizmati. Ammo vazirlik aynan qancha vaksina olib kelinganini ma’lum qilmagan. Rossiyaning O‘zbekistondagi elchixonasidan bildirishlaricha, vaksinaning ikkinchi komponentidan 50 ming doza olib kelingan.
Vazirlikning qayd etishicha, “yaqin kunlarda” o‘zbek-xitoy ZF-UZ-VAC2001 va AstraZeneca vaksinalarining ham qo‘shimcha dozalari yetib kelishi kerak. “Mamlakatimizda vaksinalarni barcha hududlarga teng taqsimlash tizimi joriy qilingan bo‘lib, birinchi navbatda xavf ostida bo‘lgan fuqarolar emlanmoqda”, — deyiladi SSV axborotida.
Avvalroq 23-aprelga o‘tar kechasi O‘zbekistonga “Sputnik V” vaksinasining birinchi partiyasi yetkazib berilgan edi (aynan qancha miqdorda vaksina olib kelingani ma’lum qilinmagan). Qayd etish joiz, O‘zbekistonga aholini emlash uchun olib kelinadigan “Sputnik V”ning yarmini tadbirkor Alisher Usmonov moliyalashtirgan. Oldinroq ushbu vaksinadan jami 1 million doza sotib olinishi ko‘zda tutilgani ma’lum qilingan edi.
O‘zbekistonda 1-apreldan 65 yoshdan katta shaxslar va tibbiyot xodimlarini koronavirusga qarshi o‘zbek-xitoy ZF-UZ-VAC2001 va AstraZeneca vaksinalari bilan emlash jarayoni boshlangan edi. 26-aprel holatiga ko‘ra, butun mamlakat bo‘yicha 565 mingdan ortiq fuqaro koronavirusga qarshi emlangan. Hukumat iyun oyi oxirigacha 4 millionga yaqin, yil oxirigacha 7 million aholini koronavirusga qarshi emlashni rejalashtirgan.
Ma’lumot uchun, O‘zbekistonga shu vaqtgacha, “Sputnik V”ni hisobga olmasa, yana 1,66 million doza vaksina olib kelingan. Ularning 660 ming dozasi COVAX tizimi orqali olib kelingan AstraZeneca, qolgan 1 millioni O‘zbekiston va Xitoy hamkorligida ishlab chiqilgan ZF-UZ-VAC 2001 vaksinasidir.
Izoh (0)