Ижтимоий тармоқларда коронавирусга қарши вакцина хусусий сектор томонидан пуллик тарзда қилинаётгани ҳақида хабарлар тарқалди. Ушбу ҳолат юзасидан Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков маълумот берди.
«Хусусий иммунопрофилактика муассасалари (вакцинация марказлари) томонидан коронавирусга қарши эмлаш жараёнларига рухсат берилган. Шу билан бирга, ҳозирги кунда коронавирусга қарши вакциналар фақат давлат буюртмаси асосида олиб келинаётганини унутмаслик керак. Ушбу вакциналар билан аҳолининг хавф ости гуруҳига кирувчи қатламлари эмланмоқда.
Таъкидланишича, хусусий иммунапрофилактик муассасалар ҳам ўзлари коронавирусга қарши вакцинани олиб келиб, эмлаш жараёнларини амалга оширишлари мумкин. Аммо ҳозирча бирор-бир хусусий вакцинация марказида бундай амалиётлар ўтказилмаяпти.
Қайд этиш лозимки, кейинчалик мамлакатга олиб келинаётган вакциналарга давлат буюртмаси шакллантирилаётган чоғда хусусий сектор эҳтиёжи ҳам эътиборга олинса (бугунги кунда вакциналарни ишлаб чиқарувчи ташкилотларнинг ишлаб чиқариш қуввати эҳтиёжни тўлиқ қондира олмаяпти), уни Ўзбекистонга етказиб бериш билан шуғулланадиган ташкилот, шу жумладан, ‘Дори-дармон’ АК томонидан ҳам хусусий секторга йўналтирилиши мумкин.
Аммо ҳозирча фақат давлат муассасаларида хавф ости гуруҳига мансуб аҳоли қатламини коронавирусга қарши эмлаш тадбирлари амалга оширилмоқда,» — дейди Нурмат Отабеков.
Ўзбекистонда 1 апрелдан 65 ёшдан катта шахслар ва тиббиёт ходимларини коронавирусга қарши ўзбек-хитой ZF-UZ-VAC2001 ва AstraZeneca вакциналари билан эмлаш жараёни бошланган эди. 26 апрель ҳолатига кўра, бутун мамлакат бўйича 565 мингдан ортиқ фуқаро коронавирусга қарши эмланган. Ҳукумат июнь ойи охиригача 4 миллионга яқин, йил охиригача 7 миллион аҳолини коронавирусга қарши эмлашни режалаштирган.
Эслатиб ўтамиз, 27 апрель куни Ўзбекистонга «Спутник V» вакцинасининг иккинчи партияси 50 минг дозада олиб келинди. Бундан аввал Тошкентга яна 1 миллион доза ўзбек-хитой вакцинаси олиб келинганди.
Шунингдек, 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.
Изоҳ (0)