Ўзбекистондаги айрим автомобилларга ёқилғи қуйиш шохобчаларидан олинган автобензинлар давлат стандарт кўрсаткичларига мос келмаётгани аниқланди, деб хабар беради «Ўзнефтгазинспекцияси» матбуот хизмати.
Маълум қилинишича, импорт асосида кириб келаётган маҳсулотлар халқаро стандартларга мувофиқ бўлиб, давлат чегараларидан олиб киришда аккредитациядан ўтган лабораторияларнинг хулосаларини тақдим этилиши талаб этилади. «Импорт автобензинларни сифатини бузилиш ҳолатлари баъзи нопок тадбиркорлар томонидан республика ҳудудида амалга оширилмоқда», — дейилади хабарда.
Таъкидланишича, «Ўзнефтгазинспекция» назорат-кимё лабораторияси томонидан нефть маҳсулотлари сифатининг назорати ва таҳлил қилиш йўлга қўйилган. Жумладан, 2021 йилнинг ўтган даврида фаолият кўрсатаётган 1286 та хусусий автомобилларга ёқилғи қуйиш шохобчалари ҳамда нефть маҳсулотларини савдоси билан шуғулланадиган 61 та йирик корхоналар назорат қилиб келинмоқда.
«Мазкур давр мобайнида 1608 та ҳолатда (22 668 тонна) нефть маҳсулотларидан намуналар олиниб, сифат кўрсаткичлари таҳлил қилинганида 94 та ҳолатда (745 тонна) нефть маҳсулотлари сифатсиз эканлиги маълум бўлди. Шунингдек, импорт асосида олиб келинган 44 855 тонна нефть маҳсулотларидан намуналар олиниб лаборатория шароитида сифат кўрсаткичлари таҳлил қилинганида, маҳсулотлар сифатли деб топилиб тегишли хулосалар берилган», — дея қайд этилади хабарда.
Аввалроқ «Ўзбекнефтгаз» АЁҚШларда сотилаётган сифатсиз бензин хорижда ишлаб чиқарилганини маълум қилганди. Шохобчаларда сотилаётган импорт автобензин ва дизель ёқилғиси сифат кўрсаткичлари амалдаги меъёрий ҳужжатлар билан белгилаб берилган кўрсаткичлардан фарқ қилиниши, яъни сифат кўрсаткичлари талабга жавоб бермаслиги аниқланган эди.
Изоҳ (0)