Президент матбуот котиби Шерзод Асадов 26 апрель, душанба куни ўтказилган брифингда ота-оналар, мактаб ва олийгоҳлар раҳбарларига ёшларни Тошкентдаги Texnopark’да жойлашган корхоналарга экскурсияларга олиб боришни маслаҳат берди. Бу ҳақда «Дарё» мухбири хабар қилмоқда.
«Президентимиз 23 апрель, жума куни Тошкент шаҳридаги Texnopark’да ҳам бўлди. Бу жойни мамлакатимизда иқтисодиётни саноатлаштиришга қаратилган ишларнинг, индустриал трансформациянинг яққол намунаси дейиш мумкин.
Биласизлар, бу ерда собиқ Тошкент авиация заводи бўларди. Охирги пайтлар унинг блоклари қарийб ташландиқ ҳолга келиб қолганди. Ҳозир кўрсангиз, ҳавасингиз келади: ривожланган давлатлардагидек замонавий, инновацион индустриал зонага айланган», — деди Асадов.
Унинг қайд этишича, Texnopark’да йил якунигача яна 7 та лойиҳа ишга тушиши орқали қўшимча 2,5 мингга яқин иш ўрни яратилади.
«Ўтган ҳафта ишга туширилган, Президентимиз борган тўртта корхонанинг ўзида минг киши, асосан, ёшлар ишли бўлган. Ҳали олдинда яна кўплаб лойиҳалар бор. Умуман олганда, бугунги кунга қадар Texnopark’да ишга туширилган 10 та лойиҳада жами 4,5 минг киши иш билан таъминланган бўлса, йилнинг охиригача ишга тушадиган яна 7 та лойиҳа доирасида қўшимча 2,5 мингга яқин иш ўрни яратилади. 2026 йилга келиб Texnopark’да ишлаётганлар сони 10 мингдан ошиши кутилмоқда.
Фурсатдан фойдаланиб, бир нарсани айтмоқчиман. Бизни кўриб турган ота-оналар, мактаб ва олийгоҳлар раҳбарлари ёшларимизни шу корхоналарга экскурсияларга олиб бориб, янги Ўзбекистондаги тарихий ўзгаришларни кўрсатишса, замонавий технологик соҳаларга қизиқтиришса, жуда яхши бўларди», — деди Президент матбуот котиби.
Изоҳ (0)