«Йилига 2-3 миллиард киловатт соат электр энергияси йўқотилмайдиган бўлди» – Президент матбуот котиби АСКУЭ тизими ҳақида

Президент матбуот котиби Шерзод Асадов 26 апрель, душанба куни ўтказилган брифингда электр энергиясини ҳисобга олиш ва назорат қилишнинг автоматлаштирилган тизими (АСКУЭ)нинг афзаллиги ҳақида сўз юритди, дея хабар бермоқда «Дарё» мухбири.

«Президентимиз 23 апрель, жума куни тушдан кейин Тошкент шаҳридаги янги корхоналар ва пойтахтдаги ободонлаштириш ишлари билан танишдилар.

Биринчи объект «Ҳудудий электр тармоқлари» акциядорлик жамиятининг Электр энергиясини ҳисобга олиш маркази бўлди. Бу марказ ҳақиқатан ҳам замонавий, энг ривожланган давлатлар даражасида. Бутун мамлакатимиздаги электр тармоқлари  «кафтдагидек» кўриниб тураркан.

Биласиз, илгари қандай бўларди? Кимдир трансформаторга ўғринча уланиб оларди, бошқа ёқда қанчадир одамга электр етиб бормасди. Ўзи, умуман, тизимда ўғрилик, узилишлар кўп эди.

Ҳозир бу янги тизим орқали қаерда ноқонуний уланиш бўлса, шу заҳотиёқ компьютерга маълумот келади. Ёки бирон жойда авария бўлса ҳам аввалгидай электр идорасига телефон қилиш шарт эмас. Бу ёқда мутахассислар қаерда носозлик борлигини онлайн режимда кўриб, ўзлари ўша ерга таъмирлаш гуруҳини юборади.

Яна бир муҳим томони, ушбу «ақлли» тизим (электр энергиясини ҳисобга олиш ва назорат қилишнинг автоматлаштирилган тизими – АСКУЭ – таҳр.) ўрнатилгани натижасида йилига турли сабабларга кўра 2-3 миллиард киловат соат электр энергияси йўқотилмайдиган бўлди. Энди бу қўшимча қувват электр тақчиллиги кузатилаётган ҳудудларга йўналтирилади», — деди Шерзод Асадов.