Ўзбекистоннинг Qanot Sharq Airlines хусусий авиакомпанияси иккита Airbus А320-214 авиаоператорини рўйхатдан ўтказгани ва яқин орада улар Ўзбекистонга етказилиши ҳақида хабар берилган эди. 26 апрель куни ушбу самолётларнинг бири Тошкентга олиб келинди. Бу ҳақда in4avia Telegram канали хабар берди.
Американинг Аir Lease Corporation’дан лизингга олинган борт яқин ўтмишда Мексиканинг Interjet авиакомпанияси таркибига бўлган.
Эслатиб ўтамиз, 2021 йилнинг февраль ойи ўрталарида Qanot Sharq Airlines хусусий авиакомпанияси Американинг иккита Airbus А320-200 самолётини ижарага олганди.
Маълумот учун, Qanot Sharq Airlines 1998 йилда рўйхатга олинган ҳамда юк ва йўловчи авиаташувларига ихтисослашган. 2003 йилдан 2012 йилгача компания «Ўзбекистон ҳаво йўллари» МАКдан Ил-76 самолётларини ижарага олган ва Ўзбекистондаги биринчи хусусий авиакомпания ўлароқ ўз чартер рейсларини амалга оширган. Компания 150 мингдан ортиқ йўловчи ташиган. Барча Ил-76 самолётлари Ўзбекистон Мудофаа вазирлигига ўтказилгач, Qanot Sharq Airlines’нинг эксплуатантлик сертификати тўхтатилган.
Янги самолётлар олиниши билан авиакомпания ҳудудий аэропортлардан бир қатор халқаро йўналишларга парвоз қилишни режалаштирмоқда.
Изоҳ (0)