Шофиркон туманига янги прокурор тайинланди

Адлия маслаҳатчиси Эшмуродов Аббос Илёсович Бухоро вилоятининг Шофиркон тумани прокурори лавозимига тайинланди. Бу ҳақда «Дарё»га вилоят прокуратураси ахборот хизмати раҳбари Анвар Эсанов маълум қилди.

Таъкидланишича, Аббос Эшмуродов тайинловга қадар, Бухоро вилояти прокурорининг вояга етмаганлар ҳақидаги қонунчилик ижроси устидан назорат бўйича катта ёрдамчиси лавозимида ишлаган. Шунингдек, у Олот туман прокурори ҳамда Жиззах вилоят прокурорининг ўринбосари лавозимларида фаолият юритган.

Эслатиб ўтамиз, Шофиркон туманига янги прокурор тайинлангунига қадар ушбу лавозимда Тангриев Жасур Олимович фаолият юритган. У 2020 йилнинг 13 апрель куни Президент раҳбарлигида ўтказилган видеоселекторда ёшлар билан ишлашдаги камчиликлари учун танқид қилинган эди.