Ўринбосар биласизми ким? Панадаги одам. Аслида у бошлиқнинг ўрнини босиши, йўқлигини билдирмаслиги лозим. Аммо ўз хожасининг қинғир ишларини бажаришдек иш билан шуғулланувчи ўринбосарлар ҳам кўп учрайди. Панадаги одам сезилмайди-да. Мабодо, каттаконнинг миси чиқиб қолса, «буларнинг ҳаммасини мен қилгандим» деб зиммасига олиши ҳам мумкин. Нима қилибди, адолатли судимиз иқтисодий жиноятларга катта жазо бермаслиги аниқ-ку. Ҳеч нарсага шаъма қилмаяпмиз.
Жиззах вилояти ҳокимининг Мирзиёев томонидан «сиёсатга хиёнат қилган» деб топилган собиқ ўринбосари Акрам Раҳмонқуловга нисбатан 2021 йилнинг январида жиноят иши қўзғатилган эди. Олий Мажлис Сенатининг яқинда ўтказилган 14-ялпи мажлисида нутқ сўзлаган бош прокурор Ниғматилла Йўлдошевнинг маълум қилишича, Раҳмонқулов 2018 йилда вилоят ҳокими ўринбосари этиб тайинлангач, уюшган гуруҳ тузиб, миллиардлаб бюджет маблағларини талон-торож қилиб келган. «...2018—2020 йилларда Раҳмонқулов жами 494 миллиард сўмлик 82 та объектда қурилиш-таъмирлаш ишларини ўзининг раҳнамолигидаги 9 та пудрат ташкилотига топшириб, қурилиш ишлари ҳажмини сунъий равишда оширилган нархларда расмийлаштириш, қўшиб ёзиш орқали қарийб 20 миллиард сўмлик бюджет маблағларини талон-торож қилган. Бу ҳозиргача терговда аниқлангани», — дейди бош прокурор.
Бош прокурорнинг қайд этишича, терговда Раҳмонқуловга тегишли корхоналарда 12 миллиард сўм, Жиззах шаҳридаги «Эски шаҳар» буюм бозорида қурилган 172 та савдо дўкони, кўп қаватли уйларда 14 та хонадон, 43 та автомашина, 37 та бошқа кўчмас мулк борлиги аниқланиб, зарарни ундириш учун хатланган. Ҳозир Раҳмонқулов ва унинг 10 нафар жиноий шериги қамоққа олинган, тергов ҳаракатлари олиб борилмоқда.
Атиги 2 йилда шунча иш қилиб юбориш мумкин бўлса, қолган мансабдорларнинг чўнтагидагини санаш қийин эмас. Энг қизиғи, Раҳмонқулов шунча ишлар қилибди-ю, ҳеч ким сезмаганини қаранг. «Сеҳрли қалпоқча» қаҳрамони ҳам бунчалик ишлолмасди.* * *
2018 йилнинг июнида «Ёшлар иттифоқи» мардикорчиликка чиққан йигитчаларни тўплаб, футбол ўйнатиб, охирида бир литрдан пахта ёғи совға қилаётган расмини қўйиб кулгига қолганди. «Ёғ берилсин» дейиш истеҳзоли тақдирлаш синонимига айланиб кетди. Аммо шу кунларда «ёғ берилсин» десангиз, киноя-пиноясиз одамлар жон дейди, чунки ўсимлик ёғи баҳоси 25—30 фоизга кўтарилиб кетди. Шу боис депутатларимиз Ўзбекистонда ўсимлик ёғи импортини ҚҚСдан озод қилиш ва унинг экспортини чеклаш таклифини Сенатга юборди. Сенат ўсимлик ёғи импортига ҚҚСни бекор қилишни маъқуллади.
Бюджет ва иқтисодий ислоҳотлар масалалари қўмитаси раиси Эркин Гадоев Ўзбекистонда ўсимлик ёғи истеъмоли ҳажми йилига 460 минг тоннани ташкил этиши, унинг ярми импорт ҳисобига қопланишини маълум қилди.
У жаҳон бозорида ўсимлик ёғи нархи йил давомида 86 фоизга, йил бошидан буён эса 21 фоизга қимматлашганини таъкидлади.
Қонун билан Солиқ кодексининг 483-моддасига (вақтинчалик солиқ имтиёзлари) ўзгартиш киритилмоқда.
Жумладан, 2021 йил 1 майдан 31 декабрга қадар бўлган даврда:- ўсимлик ёғи, кунгабоқар ва зиғир уруғи, шунингдек, соя данаги импорти;
- ўсимлик ёғини ишлаб чиқариш ва (ёки) реализация қилиш бўйича маблағлар айланмаси ҚҚСдан озод қилинмоқда.
- кунгабоқар ва пахта уруғига божхона қийматининг 30 фоизи, бироқ 1 килограмм учун 0,2 доллардан кам бўлмаган миқдорда;
- кунгабоқар ёғига 20 фоиз, бироқ 1 килограмм учун 0,2 доллардан кам бўлмаган миқдорда;
- пахта ёғига 50 фоиз, бироқ 1 килограмм учун 0,5 доллардан кам бўлмаган миқдорда экспорт божи жорий этилмоқда.
* * *
Маълумки, хакерларнинг вазифаларига тармоқ аккаунтларини бузиб кириш ҳам киради. Шу ҳафта «Kun.uz» сайти ходимининг Telegram аккаунтини бузиб киришди. Бузиб кириш ҳолати бир вақтнинг ўзида 2та ИП манзилдан — бири Тошкент ва яна бири Стокгольм шаҳридан амалга оширилган. Энг қизиғи, бунда Telegram мессенжерининг мажбурий қоидаларига зид равишда аккаунт эгаси («Kun.uz» ходими)нинг телефонига SMS орқали тасдиқлаш коди етиб келмаган. Аккаунт эгаси буни сезиб, дарҳол иккинчи сеансни ўчирган. Энг қизиғи шундан кейин рўй берган. Ортиқча сеанслар ўчирилиши билан номаълум шахс(лар) аккаунтга кириш учун фаол тарзда бир неча марта уриниб кўрган. Бу уринишлар аккаунт эгаси икки босқичли аутентификация функциясини ёққанидан сўнг ҳам давом этган, бунгача эса телефонга SMS-код келмай туриб (!), аккаунтга бир неча марта такроран бузиб кирилган. «Взлом»чиларнинг кимлиги аниқланмади.
Қизиғи шундаки, уч кун муқаддам «Kun.uz»да Давлат хавфсизлик хизматининг ахборот хавфсизлиги бўлимидан хабарларни ўчириш, қайси мавзуларда ёзиш ва қайси мавзуларда ёзмаслик бўйича босимлар, бундай талаблар бажарилмаган тақдирда таҳририят вакилларига таҳдидлар бўлаётгани ҳақида мақола чоп этилганди.
Telegram’даги «Ҳақиқат вазирлиги» канали муаллифи Сардор Салим «Силовиклар» ҳукмрон мамлакатда амалдор, журналист, блогер ва бошқа фаоллар ўзининг доимий кузатувда эканлигини эслаб яшаши керак», деб ёзди ва бунақаси Россияда ҳам бўлганини, кучишлатар хакерлар талаби билан мобил алоқа операторлари ходими тасдиқловчи SMS’ни абонентга юбормасдан ушлаб қолишини тилга олди. Хакерлар қурбонига айланмаслик учун Telegram’да икки факторлик аутентификацияни ёқиш ва хос суҳбатларни «махфий чат» орқали юритишни ҳам тавсия этди.
* * *
Коронавирусга қарши эмлаш ишлари қизғин бормоқда. Ўзбекистон ҳудудлари бўйлаб 24 апрель куни жами 15 778 киши COVID-19’га қарши эмланди, деб хабар бермоқда Соғлиқни сақлаш вазирлиги матбуот хизмати. Шу кунгача Ўзбекистонда коронавирус инфекциясига қарши эмланган фуқаролар сони 544 529 нафарга етди. Ҳозирга қадар жами эмланганлар сони бўйича рекорд кўрсаткич Фарғона вилоятида (73 479 нафар) қайд этилган. Ундан кейинги ўринларда Наманган вилояти (58 995 нафар), Самарқанд вилояти (54 054 нафар), Андижон вилояти (52 435 нафар) турибди.
Яна бир яхши янгилик шуки, 23 апрель куни Ўзбекистонга «Спутник V» вакцинасининг дастлабки партияси олиб келинди. «Спутник V» вакцинасининг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши режалаштирилган эди.
Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси эса Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси. Ўзбекистонга апрель охиригача яна 1 миллион дона Хитой ва 300 минг дона «Спутник V» вакциналари олиб келиниши керак.
Ҳозирча, дайжестимизга йиғганларимиз шулар. Карантин қоидаларига риоя қилинг. Бирор ерда ортиқча гап ёзган бўлсангиз, Telegram аккаунтингизга ҳушёр бўлинг. «Дарё»да қолинг.
Изоҳ (0)