Сенатнинг Суд-ҳуқуқ масалалари ва коррупцияга қарши курашиш қўмитаси раиси Наримон Умаров Олий Мажлис Сенатининг 23 апрель куни ўтказилган 14-ялпи мажлисида прокуратура органларининг 2020 йилдаги фаолияти ҳақида маълумот берди, деб ёзмоқда «Gazeta.uz».
Сенаторнинг таъкидлашича, ҳақиқатан ҳам жуда кўп ишлар қилинди, аммо шу билан бирга, прокуратура фаолиятини таҳлил қилиш натижалари мамлакатда қонун устуворлигини тўлақонли таъминлаш борасида ҳали ҳам долзарб масалалар мавжудлигини кўрсатмоқда.
Хусусан, репродуктив саломатликни, оналик ва болаликни муҳофаза қилишга оид қонун ҳужжатлари ижросини таъминлашдаги камчиликлар оқибатида гўдаклар ўлими 428 тага, оналар ўлими 10 тага ошган.
Прокуратура органлари томонидан вояга етмаганларнинг ҳуқуқлари ва қонуний манфаатларини таъминлаш соҳасида амалга оширилган ишларга қарамай, Нариман Умаров соҳадаги камчиликларга эътибор қаратди. Хусусан, 2020 йили вояга етмаганлар томонидан 1134 та жиноят содир этилган ва 526 нафар вояга етмаган шахс ўз жонига қасд қилган.
«Бу давлат органлари ва жамоат ташкилотлари билан ҳамкорликда амалга оширилаётган чора-тадбирлар етарли даражада самарали эмаслигидан далолат беради», — деган сенатор.
Унинг сўзларига кўра, умумий жиноятчилик 34,7 фоизга, оғир ва ўта оғир жиноятлар 49 фоизга, шу жумладан, қасддан одам ўлдириш 13 фоизга, қасддан оғир шикаст етказиш 13 фоизга, номусга тегиш 27,7 фоизга, босқинчилик 18,5 фоизга ошган.
Изоҳ (0)