Latviya rossiyalik diplomatni mamlakatdan chiqarib yubormoqda. Bu haqda respublika Tashqi ishlar vazirligi rahbari Edgars Rinkevichsga tayanib “TASS” xabar berdi.
“Chexiyalik ittifoqchilarimiz bilan birdamlik belgisi sifatida va Venadagi konvensiya buzilgani sababli Latviya rossiyalik diplomatni mamlakatdan chiqarib yuborishga qaror qildi. Latviya o‘z hududidagi, shuningdek, sheriklari va ittifoqchilari hududidagi buzg‘unchilikka jim qarab turmaydi”, — deb yozgan vazir Twitter’da.
Latviya Tashqi ishlar vazirligining xabar berishicha, tegishli qaror to‘g‘risida 23-aprel, juma kuni Rossiyaning respublikadagi muvaqqat ishlar vakili Vadim Vasilyevga xabar berilgan.
“Latviya o‘zaro hurmat, xalqaro huquq va diplomatik munosabatlar to‘g‘risidagi Vena konvensiyasi tamoyillariga tayangan holda Rossiya bilan munosabatlarni shakllantirishdan manfaatdor. Rossiyaning xatti-harakatlari azaldan ushbu tamoyillarning muntazam ravishda buzilishi va xavfsizlik holati yomonlashuvining dalili bo‘lib kelgan”, — deyiladi Tashqi ishlar vazirligi xabarida.
Latviya tashqi ishlar vazirligi, shuningdek, bunday qaror “Rossiya elchixonasi diplomatining harakatlari va uning Latviyada sodir etgan qonunbuzarliklarini baholash asosida” qabul qilinganini aytib o‘tdi. “Qaror, shuningdek, Yevropa Ittifoqi va NATO doirasidagi ittifoqchilar bilan o‘zaro maslahatlashuvlar va Latviyaning mas’ul muassasalari tomonidan taqdim etilgan ma’lumotlar asosida qabul qilindi”, — deb ta’kidladi vazirlik.
Latviya televideniyesi 23-aprel kuni o‘z manbalariga asoslanib xabar berishicha, Tashqi ishlar vazirligi respublikadagi Rossiya elchixonasining harbiy attashesini persona non-grata deb e’lon qildi. Aprel oyi o‘rtalarida Latviya Tashqi ishlar vazirligi pandemiya bilan bog‘liq ravishda epidemiologik xavfsizlik qoidalarini buzgani munosabati bilan Rossiya tomoniga norozilik bildirgan. Rossiyaning Latviyadagi elchixonasidan tezkor izoh olishning iloji bo‘lmagan edi.
Latviya bilan bir qatorda Litva hukumati ham ikki rossiyalik diplomatni mamlakatdan chiqarib yuborishga qaror qildi. Bu haqda respublika Tashqi ishlar vazirligi rahbari Gabrielyus Landsbergis ma’lum qilgan. “Rossiya elchixonasi vakili Tashqi ishlar vazirligiga chaqirildi va unga diplomatik maqomga mos kelmaydigan faoliyat bilan bog‘liq holda elchixonaning ikki xodimini Litvada nomaqbul deb e’lon qilish to‘g‘risida nota topshirildi”, — deyiladi vazirning xabarida. Ularga yetti kun ichida Litva hududidan chiqib ketish haqida ko‘rsatma berilgan.
Litvaning Moskvadagi elchixonasi Chexiyaga diplomatik funksiyalarni bajarishda yordam berishga tayyorligini bildirdi, bu esa Chexiya elchixonasi xodimlarini Rossiyadan chiqarib yuborilishi bilan murakkablashadi.
Shuningdek, Estoniya Tashqi ishlar vazirligi mamlakatdagi rossiyalik diplomat qaytarib yuborilayotganini ma’lum qildi. “Chexiya bilan birdamlik belgisi sifatida Estoniya Vena konvensiyasida kelishilgan diplomatik faoliyatga nomuvofiq ish olib borayotgan rossiyalik diplomatni mamlakatdan chiqarib yuboradi”, — deyiladi bayonotda.
Vazirlikning qo‘shimcha qilishicha, 23-aprel kuni Estoniya tashqi ishlar vazirligi Chexiyadagi Vrbetitsa qishlog‘ida sodir bo‘lgan voqea tafsilotlari to‘g‘risida Chexiyadan olingan ma’lumotlar bilan bog‘liq holda “Rossiyaning Estoniyadagi elchisi Aleksandr Petrovni hukumatga chaqirgan”.
Rossiya—Chexiya munosabatlarining keskinlashuvi 17-aprel kuni Chexiya hukumati respublika sharqidagi Vrbetitsa qishlog‘idagi o‘q-dorilar omborlarida 2014-yilda sodir bo‘lgan portlashlar voqeasining yangi holatlariga aniqlik kiritish to‘g‘risida bayonot berganidan keyin boshlandi. Chexiya tomonining so‘zlariga ko‘ra, ushbu voqeada Rossiya maxsus xizmatlari ishtirok etgan. The Insider va Bellingcat agentliklari tomonidan o‘tkazilgan surishtiruvga ko‘ra, portlashlar operatsiyasiga Rossiya razvedka boshqarmasining 29155-sonli harbiy qism boshlig‘i, general Andrey Averyanov shaxsan rahbarlik qilgan. 17-aprel kuni Praga Rossiya elchixonasining 18 nafar xodimini chiqarib yuborishni e’lon qildi. Shuningdek, Chexiya Senati hukumatni Rossiya bilan do‘stlik shartnomasini bekor qilishga va Pragada faqat bir nafar rossiyalik diplomatni qoldirishga chaqirdi. Avvalroq Deputatlar palatasi (Chexiya parlamentining quyi palatasi) ham Chexiya hukumatini shunday choralar ko‘rishga chaqirgan edi.
Rossiya ayblovlarni bema’ni va asossiz deb atadi va Chexiyaning xatti-harakatlariga javob sifatida 20 nafar chexiyalik diplomatni mamlakatdan chiqarib yubordi.
Izoh (0)