Самарқандда бўлиб ўтаётган халқ таълими ходимларини қайта тайёрлаш ва уларнинг малакасини ошириш ҳудудий марказидаги аттестация жараёнларида кузатув камерасининг тўсиб қўйилиши 2021 йил 20 апрель куни марказнинг 101-хонасида рўй берган. Бу ҳақда Таълим инспекциясининг расмий муносабатида маълум қилинди.
«Ҳар бир ҳудуддаги биноларда кузатув камераларининг узлуксиз ишлаб туриши қатъий назоратга олинган. Кузатув камераси ишламаган тақдирда, синовларни бошлашга рухсат берилмайди. Бироқ ушбу тасвирда кузатув камерасини вақтинча тўсиб қўйиш имтиҳонлар пайти эмас, синовларга тайёргарлик кўриш вақти акс этган», — дейилади мазкур воқеага муносабат билдирган масъул ташкилот хабарида.
Хабар берилишича, синовларни ўтказиш вақтида ҳар бир компьютерга махсус дастурлар ўрнатилиб, марказий серверда бирма-бир рўйхатга олинади. Ушбу дастур ёрдамида масофадан бошқариладиган дастурларни блоклаш ҳамда рўйхатга олинмаган компьютерларнинг тестга кириш имкониятини чеклаб қўйиш мумкин бўлади. Бу эса жараёнларни автоматлаштирилган дастурий тизим ёрдамида мониторинг қилиб бориш ва турли қоидабузарликларнинг олдини олишга хизмат қилади.
«Ушбу жараёнда хавфсизлик нуқтаи назаридан фақат инспекция томонидан ажратилган масъул ходимгина дастурга кириш учун пароль ва логиндан хабардор бўлади. Ҳар куни янгиланадиган ушбу пароль ва логин имтиҳон бошланишидан олдин эрталаб ҳар бир компьютерга алоҳида киритилади. Ушбу пароль ва логинни киритиш жараёнида кузатув камералари орқали тарқалишини олдини олиш мақсадида камера вақтинча тўсилган.
Ушбу ҳолатда тажрибасизлик қилган ходимларга хавфсизликни таъминлашда фуқароларни шубҳалантирадиган бундай услублардан фойдаланиш нотўғри эканлиги тушунтирилди. Инспекция масъуллари томонидан ҳамкор ташкилотлардан жалб қилинган ходимларга жараённи ташкил этиш бўйича тегишли тавсиялар берилди. Бунда хавфсизликни таъминлашда шаффофликка шубҳа уйғотмайдиган замонавий услублардан фойдаланиш зарурлиги таъкидланди», — дейилади Таълим инспекциясининг тушунтиришида.
Қўшимча қилинишича, синовларга кирувчи ҳар бир талабгор ички ишлар ва миллий гвардия ходимлари томонидан текширилмоқда. Бундан ташқари, жараёнда шаффофликни таъминлаш учун маҳаллий депутатлар, ҳуқуқни муҳофаза қилиш органлари ходимлари ҳамда кенг жамоатчилик вакиллари таклиф этилган.
«Ўз навбатида, ушбу жараёнга қизиқиш билдирган журналист ва блогерлар ҳам педагогларга халал бермаган ҳолда синовларни бевосита кузатиш имконияти мавжуд эканлигини маълум қиламиз. Фурсатдан фойдаланиб, ҳурматли педагоглар ва фуқароларимиздан малака (тест) синовлари бўйича кимдир пул ёки бошқа моддий рағбат талаб қилса, ёки бирор нохолис ёндашувга гувоҳ бўлишса, ҳуқуқни муҳофаза қилувчи органларга, Халқ таълими вазирлиги ҳамда Таълим сифатини назорат қилиш давлат инспекциясига мурожаат этишларини сўраб қоламиз», — дейди инспекция масъуллари.
Изоҳ (0)