Ўзбекистон Мудофаа вазирлиги ҳарбий хизматчилари АҚШнинг Миссисипи штатидаги Camp Shelby ҳарбий ўқув базасида ўтказилаётган «Илғор жангчи» мусобақасида иштирок этмоқда. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Мусобақа давомида иштирокчилар мураккаб сунъий тўсиқлар йўлагидан ўтиш, узоқ масофага маршни амалга ошириш, жанг шароитида ярадорга тез тиббий ёрдам кўрсатиш ҳамда тунги шароитда ҳарбий топографияда ишлаш каби топшириқларни бажарган.
Ўзбекистонлик ҳарбийлар 10 га яқин тўсиқларни ўзида жамлаган, узунлиги 900 метр бўлган йўлакдан ўтиш баҳсларида муваффақиятли иштирок этган.
Баландлиги 8 метр бўлган мураккаб шаклдаги ёғоч тўсиққа чиқиш ва тўрли арқондан фойдаланиб ундан тушиш, кенглиги 20 метр бўлган сув ҳавзасидан арқон ёрдамида ўтиш, нотекис ва ностандарт мувозанатга эга бўлган турли сунъий тўсиқлардан ўтиш каби мажмуавий машқларда кичик сержант Хайрулло Олимов 9 дақиқа 20 сония вақт сарфлаб, мусобақа рекордини янгилаган.
Мусобақанинг кейинги шартида иштирокчилардан 18 килограмм юк билан белгиланган вақт оралиғида 20 километрлик масофани босиб ўтиш талаб этилган. Мазкур шартда ҳар икки ўзбекистонлик ҳарбий хизматчи ҳам рақибларидан илдам ҳаракатланиб, марра чизиғини 2 соату 2 дақиқада босиб ўтиб, рекорд натижани қайд этган.
Шунингдек, иштирокчилар мусобақа давомида турли русумдаги қуроллардан ўт очиш, артиллерия оловини йўналтириш ҳамда тест синовларида беллашган.
Таъкидланишича, мусобақа аввалида Ўзбекистон Мудофаа вазирлиги ҳарбий хизматчилари эстафета ҳамда узоқ масофага югуриш шартларида ҳам шу кунгача қайд этилган мусобақа рекордини янгилаган.
Мусобақаларнинг якуний натижалари 24 апрель куни эълон қилиниши айтилмоқда.
Изоҳ (0)