Бухоро вилоятидаги 11 та мактабда дарслар 14 кунга онлайн шаклга ўтказилди. Бу ҳақда вилоят ҳокимининг таълим ва тарбия масалалари бўйича маслаҳатчиси, Халқ таълими бошқармаси бошлиғи Дилфуза Мустафоевага таяниб ЎзА маълум қилди.
Қайд этилишича, вилоятда халқ таълими тизими ходимларининг 6 нафарида, мактаб ўқувчиларининг эса 26 нафарида касаллик аломатлари аниқланган.
«Касаллик тарқалишининг олдини олиш ва ўқувчилар хавфсизлигини таъминлаш мақсадида ҳозирда улар фаолият юритаётган ва таҳсил олаётган 11 та умумтаълим мактабида анъанавий тарздаги фаолият тўхтатилди. Мактаблар икки ҳафталик онлайн режимга ўтказилди. Аммо ваҳимага асло ўрин йўқ. Касаллик аниқланган ходим ва ўқувчилар эса зарурий муолажаларни олмоқда», — деган Дилфуза Мустафоева.
Унинг таъкидлашича, айни пайтда касаллик юқиши ва тарқалишининг олдини олиш, ўқувчилар ва тизим ходимларининг хавфсизлигини таъминлаш мақсадида вилоят Халқ таълими бошқармаси томонидан аниқ чора-тадбирлар асосида иш олиб борилмоқда.
Вилоятдаги таълим муассасаларига 76 тонна антисептик, вилоят ҳокимлиги томонидан 50 минг дона, маҳаллий бюджет ҳисобидан 29 772 дона тиббий ниқоб, 3566 дона дозатор ва 1173 дона пирометр етказиб берилган.
Аввалроқ Бухоро шаҳридаги 3-ўрта умумтаълим мактаби ўқувчисида COVID-19 инфекцияси қайд этилгани сабабли ўқув тизими онлайн режимга ўтказилгани ҳақида хабар берилган эди.
Шунингдек, Тошкент вилоятидаги 14 та мактаб карантинга ёпилгани, Самарқанддаги 35 та мактабнинг ўқитувчи ва ўқувчиларида коронавирус аниқлани сабабли мактаблардаги ўқув жараёни онлайн шаклга ўтказилгани маълум қилганди.
Изоҳ (0)