Дунёдаги энг кичкина Polaroid камера яратилди

Polaroid компанияси бир зумда тасвирни чоп этишга қодир тарихдаги энг кичкина қурилма — Polaroid Go’ни тақдим этди, деб хабар беради Hi-Tech.Mail.ru.

Камера корпусининг ўлчамлари 10х8х5 сантиметр бўлиб, у кўплаб замонавий смартфонлардан енгилроқ. Polaroid Go’нинг ишлаш принципи ўзгармаган — карточкали картриж қўйилади, суратга туширилади ва шу заҳоти қоғозга чоп этилган тасвир олинади. Аммо карточкаларнинг ўлчами ҳам катта эмас — 6,6х5,3 сантиметр, сурат эса ундан ҳам кичикроқ бўлади.

Бир зумда чоп этиш технологиясига эга камералар анча олдин пайдо бўлганига қарамай, ҳозирда улар оммабопликнинг иккинчи тўлқинини «бошдан ўтказмоқда». Ёшларга суратни бир зумда қўлга киритиш имконияти манзур бўляпти.

Одатдагидек, бир зумда чоп этувчи камераларнинг энг қиммат қисми — бу уларнинг картрижи. Камеранинг ўзи 100 доллар атрофида туради ва 16 та карточкадан иборат картриж нархи 20 долларни ташкил этади.

Аввалроқ Polaroid «Юлдузлар жанги» мавзусидаги камера ва фотоплёнкани тақдим этгани тўғрисида хабар берилганди.