Dunyodagi eng kichkina Polaroid kamera yaratildi

Polaroid kompaniyasi bir zumda tasvirni chop etishga qodir tarixdagi eng kichkina qurilma — Polaroid Go’ni taqdim etdi, deb xabar beradi Hi-Tech.Mail.ru.

Kamera korpusining o‘lchamlari 10x8x5 santimetr bo‘lib, u ko‘plab zamonaviy smartfonlardan yengilroq. Polaroid Go’ning ishlash prinsipi o‘zgarmagan — kartochkali kartrij qo‘yiladi, suratga tushiriladi va shu zahoti qog‘ozga chop etilgan tasvir olinadi. Ammo kartochkalarning o‘lchami ham katta emas — 6,6x5,3 santimetr, surat esa undan ham kichikroq bo‘ladi.

Bir zumda chop etish texnologiyasiga ega kameralar ancha oldin paydo bo‘lganiga qaramay, hozirda ular ommaboplikning ikkinchi to‘lqinini “boshdan o‘tkazmoqda”. Yoshlarga suratni bir zumda qo‘lga kiritish imkoniyati manzur bo‘lyapti.

Odatdagidek, bir zumda chop etuvchi kameralarning eng qimmat qismi — bu ularning kartriji. Kameraning o‘zi 100 dollar atrofida turadi va 16 ta kartochkadan iborat kartrij narxi 20 dollarni tashkil etadi.

Avvalroq Polaroid “Yulduzlar jangi” mavzusidagi kamera va fotoplyonkani taqdim etgani to‘g‘risida xabar berilgandi.