Йўловчи авиаташувлари саноати 2021 йилда 47,7 миллиард доллар миқдорида зарар кўради, деб прогноз қилди Ҳаво транспорти халқаро ассоциацияси (IATA) ўз ҳисоботида. Бу ҳақда «Коммерсантъ» хабар берди.
Бу кўрсаткич IATA’нинг 2020 йил ноябрь ойидаги ҳисоботида кўрсатилганидан (38 миллиард доллар) кўра баландроқ ҳисобланади, лекин ўшанда ташкилот 2021 йилнинг иккинчи чорагидан бошлаб саноатнинг янада фаол тикланишини кутган эди.
Ташкилотнинг қайд этишича, 2020 йилги 126,4 миллиард доллар миқдоридаги йўқотишларга таққослаганда, бу йил кўрилган зарар соҳадаги яхшиланишга ишора бермоқда. Энг катта йўқотишлар Европа авиакомпанияларида (22,2 миллиард долар), шунингдек, Осиё-Тинч океани минтақаларининг авиаташувчиларида (10,5 миллиард доллар) бўлиши кутилмоқда.
IATA ҳисоб-китобларига кўра, умумий ҳисобда, 2021 йилда йўловчи ташиш ҳажми 2019 йилдаги кўрсаткичнинг 43 фоизигача қайта тикланиб, ташилган йўловчиларнинг умумий сони 2,4 миллиардга етиши мумкин. Бу 2020 йилдаги йўловчилар сонига (1,8 миллиард киши) қараганда кўпроқ, лекин 2019 йил кўрсаткичларига (4,5 миллиард киши) таққослаганда анча кам ҳисобланади.
Ички авиақатновларнинг халқаро парвозларга қараганда тезроқ тикланиши кутилмоқда. 2021 йилнинг иккинчи ярмига келиб 2019 йилги ички авиақатновларнинг 96 фоизи қайта тикланиши мумкин. Глобал авиасаноатнинг йўловчилардан ва юклардан келадиган даромади 2021 йилда 458 миллиард долларга етиши кутилмоқда, бу 2019 йилдаги даромаднинг 55 фоизини ташкил этса, 2020 йилникидан 23 фоизга кўпроқ ҳисобланади.
Аввалроқ коронавирус пандемияси туфайли Франция ҳукумати Бразилия билан, Россия ҳукумати Туркия билан авиақатновларни бекор қилди. Ушбу мамлакатларда вазият барқарорлашса, авиақатновлар қайта тикланиши маълум қилинди.
Изоҳ (0)