Ўзбекистон Коррупцияга қарши курашиш агентлиги 2020 йилда содир этилган коррупцион жиноятлар статистикасини эълон қилди.
Эълон қилинган маълумотларга кўра, судлар томонидан 2020 йил давомида жами 2270 нафар шахсга нисбатан коррупция билан боғлиқ 1502 та жиноят иши кўриб чиқилган. Коррупцион жиноятларнинг содир этилишига асосан моддий манфаатдорлик (30 фоиз), бюрократик тўсиқларнинг мавжудлиги (28 фоиз) ва ижтимоий таъминланмаганлик ёки адолатли меҳнат шароити йўқлиги (12 фоиз) сабаб бўлган.
Жиноятларнинг содир этилишига сабаб бўлган омиллар:
- давлат харидлари билан боғлиқ қонун талабларига риоя қилинмаганлиги — 45 нафар шахс;
- ҳуқуқбузарликка қарши курашиш борасидаги профилактика ишлари самарали тарзда олиб борилмагани — 45 нафар шахс;
- давлат хизматчиларини танлов асосида саралаб олиш, лавозимга тайинлаш ва юқори лавозимларга кўтаришнинг шаффоф тартибининг мавжуд эмаслиги — 50 нафар шахс;
- айбланувчининг соҳага тааллуқли бўлмаган хизматларга бириктирилгани (соҳасига тааллуқли бўлмаган хизматларда содир этилгани) — 55 нафар шахс;
- шахснинг (жабрланувчи) ўз манфаати йўлида қонунни четлаб ўтишга уриниши ёки бошқа тарздаги манфаатдорлиги сабабли жиноятга йўл очиб бергани — 88 нафар шахс;
- иш ҳажмининг тўғри тақсимланмагани ва малакали хизмат кўрсатилмаслиги — 99 нафар шахс;
- давлат органлари ходимлари мансаб ёки хизмат мажбуриятларини бажариш чоғида манфаатлар тўқнашувига олиб келадиган ёки олиб келиши мумкин бўлган шахсий манфаатдорликка йўл қўйгани — 122 нафар шахс;
- ишга қабул қилишда мансабдорнинг (ходимнинг) шахси лозим даражада ўрганилмагани, айбланувчининг малака даражаси етишмаслиги (муқаддам жиноят содир этганлиги ёки содир этишга мойиллиги) — 179 нафар шахс;
- айбланувчининг ижтимоий таъминланмагани ёки адолатли меҳнат шароити ташкил этилмагани — 262 нафар шахс;
- тизимда иш фаолияти тўғри йўлга қўйилмагани, соҳада бюрократик тўсиқларнинг мавжудлиги (фаолиятнинг ўзи коррупцияга йўл очиб бергани) — 598 нафар шахс;
- фуқароларнинг моддий манфаатдорлик ёки шахсий бойлик орттириш йўлида жиноятга қўл уриши каби омиллар коррупция билан боғлиқ жиноятларнинг содир этилишига имкон яратган — 642 нафар шахс.
Жиноят ишлари асосан пора бериш (1056 нафар шахс), мансаб сохтакорлиги (825 нафар шахс), ҳокимият ёки мансаб ваколатини суиистеъмол қилиш (184 нафар шахс) ва пора олиш (133 нафар шахс) моддалари бўйича очилган.
Таҳлилларга кўра, коррупция билан боғлиқ жиноятлар асосан ишсизлар (23 фоиз), таълим (17 фоиз), тиббиёт (7 фоиз), банк (5 фоиз), қурилиш (3 фоиз), ички ишлар (3 фоиз) тизими ходимлари томонидан содир этилган.
Аввалроқ Ўзбекистонда сўнгги икки йил ичида коррупцион жиноятлар оқибатида жами 371 миллиард сўм бюджет маблағлари талон-торож қилингани, Коррупцияга қарши курашиш агентлигига суд ва прокуратура қарорларидан норози аҳоли кўпроқ мурожаат қилаётгани, мамлакатда коррупцион жиноятлар асосан ким томонидан содир этилаётгани тўғрисида хабар берилганди.
Изоҳ (0)