Нидерландиядаги ташландиқ гараж ичидан Range Rover йўлтанламаслари коллекцияси, шунингдек, бошқа маркадаги бир нечта автомобиллар топилди. Эълон қилинган суратларга кўра, машиналарнинг деярли барчаси ачинарли аҳволда ва йўлларда ҳаракатлана олиши даргумон, деб хабар беради Motor.
Ташландиқ Range Rover’лар деворлари бузилган ғиштли омборга ўхшовчи эски гараж ичидан топилган. Вайрона ёнидаги ҳудудда ўндан ортиқ Британия йўлтанламаслари жойлашган бўлиб, улар аянчли аҳволда. Автомобильлар чанг ва занг билан қопланган, машиналарнинг аксариятини шиналари «ўтириб» қолган.
Гараждаги Range Rover’ларнинг аксарияти биринчи ва иккинчи авлод моделлари ҳисобланади. Суратларда классик модификациядан ташқари очиқ кузовли ва юмшоқ томли версияларни ҳам учратиш мумкин. Автомобилларнинг бу каби версиялари махсус буюртма асосида яратилган. Бундан ташқари, ташландиқ машиналар орасида R107 ва R123 кузовидаги иккита классик Mercedes-Benz’ни ҳам учратиш мумкин.
Мазкур автомобиллар «қабристони» кимга тегишли эканлиги ва моделлар нима сабабдан бу каби ҳолатдалиги номаълум.
Аввалроқ британиялик сураткаш Эми Шор мамлакатдаги Land Rover йўлтанламаслари қабристонини топиб олганди. У ерда асосан «умрини яшаб бўлган» биринчи авлод Range Rover’лари жойлашган, бироқ улар орасида иккинчи авлодга тегишли нусхалар, шунингдек, классик Land Rover Defender’ларни ҳам учратиш мумкин эди.
Изоҳ (0)