Huawei компанияси ҳаракатланиш масофаси оширилган SERES SF 5 моделлари Хитойдаги дўконлари бўйлаб сотувга чиқишини эълон қилди. SERES компанияси «1+8+N» универсал экотизимига қўйилган биринчи автомобиль ишлаб чиқарувчига айланди, деб хабар беради Hi-Tech.Mail.ru.
Huawei SERES билан ҳамкорликда бир марта қувватланиш орқали узоқ масофага ҳаракатлана оладиган электромобилни яратди. Huawei DriveOne 3/1 тизими нафақат автономликни оширади, балки электромоторлар самарадорлигини жаҳон синфи моделлари даражасига кўтариш имконини беради. Янги SERES SF5 йўлтанламаси шаҳар режимида 180 километр, узоқ масофага мўлжалланган оширилган режимда 1000 километрдан ортиқ йўл босиши мумкин.
Электромобил енгил алюминий шасси ва тўртта шарли шарнир, илғор «подвеска»га эга бўлган. Шу билан бирга, SERES SF5 соатига 100 километр тезликка 4,68 сонияда эриша олади.
Huawei HiCar ечими исталган вақтда навигация, мусиқа ва бошқа функцияларга кириш имкониятини яратиб, смартфондаги дастурлар ва транспорт воситасининг асосий компьютери ўртасида маълумотлар алмашинишига имкон беради. Масалан, смартфондаги мусиқани машина динамиклари орқали тинглаш мумкин. Интерфаол овозли бошқарув ҳаракат вақтида диққатни жамлашга ёрдам беради. Huawei HiCar автомобилни Huawei’нинг универсал экотизими таркибига кирувчи «ақлли» қурилмаларга улай олади.
SERES SF5 кенг ҳажмдаги овоз чиқарувчи 11 динамикдан иборат аудиотизим билан жиҳозланган бўлиб, у Huawei Sound мутахассислари ва акустика экспертлари томонидан созланган.
Шунингдек, электромобилда аварияли қувватлантириш режими мавжуд бўлиб, бунда бошқа электромобил (V2V) аккумуляторидан қувватланиш мумкин. Батареялардан ташқи истеъмол манбаи сифатида ҳам фойдаланса бўлади.
1500 мегапаскал босим остида термик ишлов берилган пўлатдан тайёрлаган SERES SF5 кузовининг қаттиқлиги хавфсизлик стандартларига жавоб беради. Бошқаришда автоматик ёрдам берадиган L2+ даражаси тирбандликлар вақтида қўл келади. Машинанинг олд қисмига вентиляция, иситиш ва массаж функцияларига эга ўриндиқлар жойлаштирилган.
SERES SFФ 5 нархи 4WD версияси учун 38 минг доллардан, 2WD версияси учун эса 33 минг доллардан бошланади.
Аввалроқ Xiaomi компанияси ўз автомобилини яратишни бошлагани тўғрисида хабар берилганди.
Изоҳ (0)